Siman pasa unanimamente den sala di Parlamento a pasa cambionan den un ley cu ta atende cu e forma con destahonan ta tuma luga mediante di nos ley di contabilidad. Esaki ta hopi importante mirando cu durante di e ultimo añanan, hopi a laga un interpretacion habri pa e forma con destahonan tabata tuma luga, Minister di Desaroyo Teritorial, Infrastructura y Medio Ambiente Otmar Oduber a duna di conoce.
Gobierno tin tres forma cu por cumpra producto/ servicio:
- Pa un suma bou di 10 mil florin por cumpra un product/ servicio door di simplemente haci peticion pa un oferta. Pa cual a traves di un inkooporder ta haci compra for di instancianan.
- Ta haci un onderhandse aanbesteding. Cual (tabata) determina anteriormente entre e suma di 10 mil y 100 mil florin. Pa cual ta invita minimo 3 compania pa participa den compra cu mester tuma luga.
- Pa compranan riba 100 mil florin, esaki mester bay a traves di un destaho publico.
E cambionan principal cu a tuma luga siman pasa ta e hecho cu e barera nan di suma di e 3 puntonan (formanan pa cumpra produco/servicio) a cambia. Pues a amplia e barera pa por haci e proceso di toma di decision mas flexibel.
Anteriormente por a desvia di un destaho publico of for di un onderhaandse aanbesteding door di traha un Decreto Ministerial (MB). Aworaki e ley ta limita na un serie di motibonan (7) cu por desvia. Contrario na antes, aworaki ora cu e Minister desvia a traves di un MB, esaki tincu wordo publica den Landscourant cu e argumento stipulando cual ta e motibo (for di e lista limita) pa cual e Minister a desvia.
E cambionan aki segun Minister Oduber ta splica ta e cambionan di mas grandi cual a traves di nan ta crea mas transparencia, siguridad y credibilidad den e forma con Gobierno ta atende cu su destahonan. Adicionalmente e ta mas cla y simpel creando un ‘level playing field’. Consecuentemente tur hende cu ta atende cu Gobierno sa cu na un forma husto nan por participa den destahonan y cu e ley di contabilidad no ta wordo mal uza.