Oranjestad – Diadomingo den oranan di mainta trempan, presencia di polis ta wordo pidi na un cas den area di Mon Plaisir.
E caso tawata algo horibel, loke un hobencita mester a pasa aden ora ela lanta mainta.
Tata di e hobencita cu a yama a polis a conta polis cu su yiu muhe menor di edad a spierta mainta y ta haya un homber desconoci pe para den su camber ta wak’e.
Mas cu claro su prome reaccion tawata grita mas duro cu e por.
Esaki a pone e homber perverso aki sali na careda for di e cas, Dios so lo por sa cu ki intencion e homber perverso aki lo tabata tin.
Auto di e homber desconoci aki tawata staciona pafo di e cas, den su ansha pa huy, ela dal e Nissan Versa di e famia staciona dilanti di e cas.
Probablemente ta trata di un Nissan March color geel of beige y cu lo mester tin sla na e parti di dilanti.
Departamento di trafico a presenta na e sitio, pa atende cu e hit and run aki.
Si tin un persona cu por a mira sa algo di e auto aki, lo ta bon pa avisa autoridad mesora, pa asina por atende cu e homber perverso aki.
Unabes un hende hinca den su cabes pa haci algo asina, e ta wordo considera un persona peligroso y mas ainda tin e coraha di pa drenta den e cas, den camber di un mucha, mientras tawata tin mas hende drumi den e cas.
Kiko tawata su intencion, con e sa cu e mucha ta drumi eyden, con ela haci drenta y cuanto rato elo tawata tin den e camber di e mucha, no ta conoci pa nos.
Esaki ta un caso serio, cu sigur lo mester tur atencion di autoridad, paso unabes cu ela yega asina leu, sigur esaki no lo keda na un bes y lo por sigui cu su actonan perverso aki.