ENCUENTRO ANUAL IMPORTANTE CU PARTNERNAN LATINO AMERICANO
Oranjestad – Aruba Tourism Authority ta cla pa yama bonbini na e di 29 Conferencia Anual De Turismo Aruba – CATA 2019. Esaki ta un encuentro cu ta conta cu mas cu 70 participante internacional di diferente pais di Latino America cual ta; Colombia, Argentina, Chile, Brasil, Uruguay, Peru, Venezuela, Mexico, y Panama. E participantenan lo consisti di Tour Operators, representantenan di aerolinea, hoteleronan representando Aruba den e mercado y representantenan di Aruba den e mercado Latino Americano hunto cu miembronan di prensa.
CATA su obhetivo, pa 29 aña caba, ta pa brinda posibilidad pa reforsa e conocimento di Aruba na e ehecutivonan y pa sigui traha riba e relacionnan cu e socionan, enfocando asina riba oportunidadnan cu por enrikece nos mercado turistico. E conferencia lo tuma luga entre 8 pa 11 di mei cu un programa intensivo incluyendo un variacion di actividadnan. Lo inicia parti anochi cu e apertura oficial cu palabra di bonbini di minister encarga cu Turismo, Deporte y Salud sr. Dangui Oduber, y di CEO di Aruba Tourism Authority, Ronella Tjin Asjoe-Croes. Riba e siguiente dia lo continua cu diferente presentacion y exposicion. Akinan lo conta cu algun presentacion di Camilo Plazas, Chief Innovation Officer di MullenLowe SSP3, Álvaro Sepúlveda, experto den maneho di data pa mercadeo di influencia y socio fundador di Social Media Trend y Power Influencer. Pa clausura di CATA 2019 tur participante lo wordo traslada pa Parke Nacional Arikok pa un bishita y mirada mas cerca di nos recursonan natural, nos cultura y nos bunita flora cu fauna, cu un accento clave riba loke ta conservacion di nos medio ambiente tambe.
Latino America ta e di dos mercado di mas grandi pa locual ta turismo pa Aruba. CATA sigur ta un encuentro hopi importante pa nos industria turistico. Aruba Tourism Authority ta desea tur participante hopi exito y ta desea nos huespednan un dushi y productivo estadia na Aruba.