Schelpstraat, Oranjestad: Dialuna den oranan trempan di mainta, presencia di polis ta wordo pidi cu urgencia na e oficina di Monumentenburo pa un adicto ambulante cu menos bon intencion lo a cende un candela na e trapi di oficina di Monumentenburo.
Na yegada di polis e candela tabata paga caba, e directora a splica polis cu nan tin hopi molester di e adictonan ambulante cu ta circula eybanda, pero hopi biaha ta tolera nan presencia paso nan tin toch un bon relacion cu hopi di nan, pero Mexi Lont si a pasa e linea, despues cu a pidie pa piki su cosnan y bandona e sitio. Mexi no a gusta, ela rabia y a dicidi di cende un candela. Danki na e reacion lihe di algun trahador di Monumentenburo, kendenan mesora a bay cu un aparato di candela pafo y a logra paga e candela, asina evitando cu e candela lo expande.
Tur e problema a cuminsa mainta ora cu e trahadornan a yega y a topa cu e conocido adicto ambulante Mexi Lont morto na soño drumi na e entrada di e oficina. E directora a cuminsa reclama y bise cu e mester piki su cosnan y bay for di e entrada di e oficina. Mexi no kier a lanta y nan a dicidi di yama polis pa Mexi, esaki lo a pone Mexi rabia, paso e no ta aprecia ora hende lante mainta tempran for di soño. Ela lanta cu hopi rabia y ora ela tende cu nan a yama polis pe, ela dicidi di cende un candela. Segun Mexi e mes a bati bisanan cu ela cende un candela eyfo.