Fase 2 di e trabounan di expansion di Aruba Carnival & Entertainment Village ta encera tres edificio/kiosko ambos banda (total 6) y construccion di bañonan. Fase 1 tabata realisacion di e bunita mural cu reconocemento di artistanan, Fontein y dos ‘ticket booths’! Kioskonan (estilo linear park) y bañonan lo tin entrada di paden y di pafo pa esnan cu ta haci uzo di e establecimento ora cu por ehempel nan ta warda pa autobus! Pero lo por habri parti paden tambe pa ora cu tin evento. E trabounan tin un duracion di 6 luna pues ta programa pa finalisa na September!
E prome fase di trabounan di expansion di Aruba Carnival & Entertainment Village a conclui na momento cu a termina cu e mural di fama. E di dos fase ta hopi importante pasobra esaki ta crea un desarpyo nobo economico (tipo linear park), pa cual a cuminsa traha e prome seis kioskonan. Minister Oduber a splica cu e intencion ta cu esaki ta bira un sitio pa trek nos localnan y specialmente esnan cu ta biba den e bario y no solamente turista. Creando oportunidad economico den e area conhuntamente cu e infrastructura di tin baño publico. E chauffeurnan di autobus cu ta para net dilanti di Carnival & Entertainment Village awor tambe lo tin area pa refresca dunando e area un uzo adicional.
E kioskonan lo habri di ambos banda di e cura di Carnival Village haciendo e posibel cu nan por sirbi comunidad henter aña door di e parti pafo, pero ora cu tin evento nan por habri y bende di paden tambe. Diferente persona ta puntra con nan por bin na remarke pa un di e kioskonan aki, pa cual ta informa cu e peticion meter drenta na DIP cu lo evalua esaki. E vision pa e kioskonan ta pa bin cu conceptonan cu ta mantene e caracteristica di San Nicolas, manteniendo e parti tipico, historico y cultural.
E proyecto a inicia na maart y tin un duracion di 6 luna, pa cual ta premira cu e fase 2 lo termina na luna di September. Dibiaha despues di esaki lo inicia cu e di tres y ultimo fase cu ta encera e stage permanente di Carnival & Entertainment Village conhuntamente cu oficina pa organisacionnan por opera for di e sitio, Minister Otmar Oduber a termina bisando.