Parlamentario Endy Croes ta splica cu djodjomento a continua den Lotto pa Deporte. Ta momento pa Canadian Bank Note “step up to the home plate” y tuma accion pasobra Lotto ta di malo pa peor. No obstante cu promer siman di juni finalmente y muy probablemente lo bay tin un veredicto final den e caso aki unda lo mester por trece un cambio den tur locual ta pasando den Lotto.
Nos ta keda cu preocupacion pasobra apesar di tur e documentonan cu ta hole corupcion ta riba caya, ainda esnan sinta den Lotto kier djodjo manera nan ta bisa na Hulandes ‘met de laatste loodjes’. Eli Kock ta un di nan por ehempel a wordo señala na un hotel recientemente den compania di un abogado kende su nomber tambe ta aparece riba e lista di abogadonan cu a cobra bastante placa pa nan servicio y tabata come na grandi.
Locual a sorpresa tur hende cu despues di bebe basta biña di luho y come steaknan di mas caro ta swipe cu un tarheta di Lotto pa Deporte pa paga e cuenta aki. Esaki sigur no tabata tin ningun apariencia di un business meeting. Finalmente e siman entrante lo bira un siman importante pa finalisa detayenan pa Algemene Rekenkamer por drenta Lotto y haci un investigacion na e doelmatigheid y rechtmatigheid di MIYONES cu a wordo malgasta.
Tristo pa mira fin di e siman aki ainda nos hobennan den tur skina pidiendo placa pa deporte mientras algun miembro di bestuur ta djodjo sin fin. Mester bin claridad den 2019 con lo mester cobra e miembronan di bestuur cu a haci nan mes culpabel na comete fraude, y malversacion cu fondonan destina pa Deporte. Un pueblo awendia mucho mas atento y ta yuda nos vigila di cerca e “roversbende” di Lotto. Spera cu e Canadesnan ta pone nan mes na altura y pensa cu tur seriedad solucion real pa locual cu nan a laga pasa den Lotto. Pueblo, boso wowo ta nos wowo, Parlamentario Endy Croes ta termina bisando.