Recientemente un carta interno di Banco Central di Aruba a sali den publicidad riba cual Parlamentario Arthur Dowers a bin cu diferente ponencia y acusacion. Primeramente mester menciona cu Banco Central di Aruba tin un rol di screening cu tincu tuma luga na momento cu un inversionista ta haci inversion pa cual mester licencia pa importa placa cu ta wordo financia di exterior. Considerando cu diferente pregunta a bin dilanti den comunidad pa locual ta e carta di banco central, Gobierno di Aruba a publica un comunicado informando comunidad di e screening cu ta uno usual cu ta tuma luga riba peticion di Gobierno di Aruba. Esaki den cuadro di e proceso cu a inicia pa otorgamento di un permiso di divisas.
E contenido di e carta di Banco Central ta encera entre otro un alerta na banconan a base di un articulo cu a wordo publica den un matutino. Adicionalmente, parlamentario Dowers a duna e carta di Banco Central un interpretacion adicional, como si fuera tin algo robes cu ta tumando luga. Sr. Dowers a haci diferente acusacion y na dado momento a te hasta referi na proyecto como un ‘pacto diabolico’.
Durante di un conferencia di prensa Minister Oduber a duna splicacion amplio di e proceduranan cu ta tumando luga. A splica cu na e momentonan aki mescos cu ta e caso den tur otro proyecto, screening di esnan envolvi ta tuma luga. Gobierno a haci tur e documentacionnan necesario y a stipua tur e rekisitonan manera ta e caso cu tur otro grupo. E grupo di inversionista na e momentonan aki practicamente a cumpli cu tur exigencia di DIP y aworaki ta na e parti di screening financiero cu tincu tuma luga.
Acerca di esaki den declaracion di sr. Dowers a tuma nota cu el a expresa cu Minister Oduber a bandona Partido AVP pa motibo di hotel na San Nicolas, cual Minister Oduber a enfatisa di no tabata e caso, sino cu e motibo cu a bandona e partido tabata pa door di e ‘holor’ di corupcion cu tabatin na cantidad. Comunidad por mira aworaki a base locual ta sosode cu ex coleganan, famianan y amistadnan di e ex Partido, y te hasta na nivel internacional cu esnan cu e Partido tabata atende cu ne, tin personanan deteni/condena.
Finalmente Minister Oduber a enfatisa di lo sigui traha duro conhunto pa logra yega e meta di realisacion di desaroyo na San Nicolas. E Gobierno aki ta percura pa tin integridad y transparencia den proyectonan, y sr. Dowers mester realisa cu e politica di lastra hende y haya credito ta algo cu mester laga den pasado.