Parlamentario di Fraccion di POR, Alan Howell, durante conferencia di prensa a papia riba e presentacion cu minister di Husticia, Andin Bikker a duna tocante ekipa Cuerpo Policial cu mas tanto material cu ta posibel pa nan por duna y brinda servicio na un manera mas profesional y rapido pa yuda combati criminalidad.
Minister di Husticia den e vision di gobierno y den cuadro tambe di un mocion presenta pa colega di Howell den Parlamento, Rocco Tjon, den nomber di coalicion, a indica cu lo bay ekipa e autonan di polis cu material sofistica, entre otro laptop den auto.
Parlamentario di POR ta bisa cu esaki ta yuda pa por haya hopi mas informacion den tempo real y no lo mester warda riba centrale post pa haya cierto informacionnan, por ehempel di un delincuente. Polisnan riba caya mes lo por haya e informacionnan necesario na e momento ey a traves di e laptop den e auto. Un ehempel cu el a duna di e ventahanan di e laptop ta si un patruya bay un cas di un sospechoso peligroso, e polisnan lo por haya informacion hopi valioso for di e laptop. Otro ehempel ta cu e sistema aki por reconoce un number di auto y duna e patruya cu e number aki por ehempel tin un delito riba dje, es decir, lo duna e polis e señal cu e number di auto en cuestion ta wordo busca pa Cuerpo Policial debi na un delito.
Alan Howell ta spera cu minister di Husticia traha mas rapido cu ta posibel pa e proyecto aki mira luz di dia y brinda di e forma aki comunidad mas siguridad, cual ta algo cu pueblo ta desea.