Di acuerdo cu Parlamentario Endy Croes Parlamento a ricibi contesta oficial di Gobierno alrespecto un carta di Dowers data 9 di April 2019. Nos tur por corda con Dowers, Benny Sevinger, Richard Arends y Candelaria a arma ful un show dilanti porta di Parlamento. Eynan hunto cu Speed, e portavoz di Mike Eman, a crea ful un sensacion cu un carta di Embahada Hulandes lo a drenta unda posiblemente ta acusa Parlamentario Endy Croes di mensensmokkel.
Como cu ta den e siman cu AVP tabata buscando un sensacion pa ranca hende pa nan manifestacion kisas nan a pensa cu esaki por ta un target pa nan exito. Sinembargo Pueblo a mustra di ta hopi mas inteligente y a percura pa no laga e manipulacionnan di AVP traha sin mas. Parlamentario Endy Croes a sali splica ampliamente den prensa alrespecto ASB (Aruba Softball Bond). Pues absolutamente ta rechasa e actitud y acusacionnan di AVP.
Parlamentario Croes ta cuestiona si con AVP den un periodo cortico asina por a yega na conclusionnan asina eroneo. Pero esaki nos atende cu ne mas despues. Desde 9 di April cu e carta di Dowers y AVP a drenta Parlamento solicitando pa un supuesto “carta” di Embahada Hulandes, Parlamento a dirigi esaki mesora mediante canalnan oficial pa Promer Minister.
Dia 15 di April a drenta un carta Parlamento como contesta oficial di Gobierno unda ta splica cu Gobierno a verifica cu tanto Directie Buitenlandse Betrekkingen (DBB) y tambe DIMAS unda ambos a confirma cu ningun di dos a ricibi un “carta” di Embahada Hulandes contra Parlamentario Croes riba e tematica aki. Parlamentario Croes ta aclarea asina e asunto aki.