Parlamentario Endy Croes a sigui e conferencia di prensa di Minister di deporte dialuna ultimo unda minister Dangui Oduber a baha pisa riba e miembronan di directiva actual esta activistanan di AVP, amigonan di Mike Eman y Mike De Meza kendenan aparentemente tin sosten ainda di Canadian Banknote. Minister Oduber a splica alrespecto un cantidad di hechonan nobo, esta pruebanan nobo cu el a logra haya cual ta pruebanan di ladronicia y fraude sin fin den e Fundacion.
Fiestando cu placa di deporte
Den tur e bada bada aki e pensionadonan Eli Kock, Silvio Janga, Antonio Kamperveen y Flavio Faneyte (Hefe corupto di Elmar) ta esnan cu ainda a keda. Tur a pasa 8 aña den bestuur y a cambia e Statuutnan dia 17 di October 2017 pues un luna despues di eleccion pa nan keda probecha di e placa di deporte. Con ta posibel cu no tin jaarrekening desde 2014 bin ariba? Esaki ta impugna cu tur dos statuut, esta e statuut anterior y esun cu nan mes a cambia. Minister a splica di un compania Secunet cu tabata strica miles y miles cobrando pa comunicacion mientras e placa enrealidad tabata bay pa paga auto di huur pa miembronan di bestuur fiesta. Mesun bestuur aki a paga mas di 2.5 MIYON na abogado y compania di investigacion. E suma aki ta refleha solamente aña 2010 y 2011 y apenas e siman aki lo ricibi algun aña mas cual ta indica cu facilmente e suma lo surpasa 3 MIYON florin.
Tene man cu e coruptonan
Pueblo ta comprende awor e magnitud di e malversacion? Pueblo ta comprende cuanto parke deportivo y cuanto atleta por a desaroya cu 3 MIYON florin? Ainda e siman aki activistanan di AVP – kendenan a ricibi instruccion di Mike Eman un anochi promer cu nan manifestacion – a manda un carta pa Minister pa purba di silenci’e sino nan lo haci un beroep riba e dwangsom di Hues pa cobra e Minister 250 mil florin. Con por ta posibel cu un compania renombra mundialmente ta tene man cu coruptonan asina keto bay? Kisas Canadian Banknote ta defendiendo nan contract? Mester accentua cu Minister a splica cu apenas 4 Miyon a bay pa Deporte den 2017 mientras cu Canadian Banknote a strica riba 11 MIYON den e contracto stinki di Visser/De Meza y Schwengle a firma den desbentaha total di pais Aruba y sigur den desbentaha di nos deportistanan.
Parlamentario Croes ta bisa cu nunca den su bida el a mira un contracto tan desbentahoso firma di e estado aki. Shame On You! Un total di 4 Canades a yega Aruba unda ayera nan tabata henter dia den reunion acompaña pa dos consehero local. Ta kico por spera di e reunion aki? Segun Croes nada pero nada ilustrante. Un cos ta sigur cu e Minister encarga tin confianza di henter Gobierno cu mester haci cambionan radical den Lotto banda di un investigacion. A tarda un poco pero e dianan ta cerca, Croes ta termina bisando.