Home Politics Minister Chris Romero a haci apertura di Setar su Youth Tech Event...

Minister Chris Romero a haci apertura di Setar su Youth Tech Event 2019

Diasabra mainta trempan Minister Chris Romero, titular di e cartera di Comunicacion, tabatin e honor di haci apertura di SETAR NV su Youth Tech Event 2019. Como prome aña organisando e evento tecnologico aki, SETAR NV a pone agricultura como tema principal. Aki ta unda cu diferente scol na nos isla a haya e oportunidad di crea nan mesun proyecto di agricultura y presenta esaki pa asina participa pa e premio final.

 

Tabata un dia hopi interesante y interactivo pa nos hobennan. E hobennan cu a participa a forma parti di diferente workshops, sesionnan informativo, charlanan cu invitadonan local y internacional, pero tambe a haya presentacion di diferente “gadgets” futuristico. Sigur un dia hopi interesante y educativo pa nos hobennan!

 

Como un docente di profesion y ainda di curason, Minister Romero a keda hopi satisfecho di mira e caranan alegre di e hobennan cu tabata presente for di oranan trempan di diasabra mainta, algo cu den su experiencia como educador ta un muestra cu nos hobennan na Aruba mester mas evento di e indole aki durante henter aña.

 

Minister Romero ta gradici y felicita SETAR NV pa bin cu e iniciativa pa organisa un evento asina grandi pa e bienestar educativo di nos generacionnan di mas hoben. Y tambe un danki na Santa Rosa/DLVV pa nan colaboracion den e Youth Tech Event di e aña aki.