Home Politics Minister Chris Romero ta firma acuerdo cu Onderzoeksraad voor de Veiligheid (OVV)

Minister Chris Romero ta firma acuerdo cu Onderzoeksraad voor de Veiligheid (OVV)

Recientemente e titular di e cartera di Transporte, Minister Chris Romero, a firma un acuerdo cu e Conseho di Investigacion pa Seguridad di Reino (Onderzoeksraad voor de Veiligheid). E acuerdo aki ta stipula procesonan y proceduranan pa Onderzoeksraad voor de Veiligheid (OVV) duna asistencia na Aruba den caso di un accidente aereo di gran embergadura.

Den ley tin un provision caba cu OVV por yuda Aruba, pero esaki nunca a wordo finalisa. E acuerdo aki tabata un di e asuntonan cu a keda pendiente pa wordo finalisa pa asina Aruba por sigura e cumplimento di e rekisitonan di ICAO, riba e tereno di investigacion di accidente di aviacion. Ta e intencion pa Corsou y Sint Maarten tambe firma e acuerdo aki den futuro, cu lo haci di esaki uno multilateral den Reino Hulandes.

Aruba tin su mesun expertonan riba tereno di investigacion di accidente di aviacion y awor por conta cu un network di acuerdonan tanto cu Hulanda, como tambe den nos region mes, pa asisti unda ta necesario cu experticio of material. E conhunto aki ta forma un sistema robusto y confiabel di investigacion di accidentenan di aviacion.

Ministerio di Transporte ta extende un elogio y gradicimento na Directie Luchtvaart pa e trabou realisa diligentemente pa haci e acuerdo aki posibel.