Diahuebs ultimo e avion conoci como Hurricane Hunter Hercules tabata di bishita na Aruba. E bishita aki ta den coneccion cu e tour di conscientisacion riba horcan, den cual varios cientifico di NHC ta biahando rond di Caribe cu e tripulacion di e avion Hurricane Hunter WC-130J di USAF.
A conta cu presencia di Minister Zita Jesus-Leito for di Corsou, kende a bay bek na nos isla ruman den e Hurricane Hunter Hercules. Tambe tabata presente Director di Meteo Corsou, sr. Albert Martis, y sr. Dave Barkmeyer kende Director Interino di Meteo Aruba. E Ministernan y invitadonan a bay conoce Hurricane Hunter Hercules di serca y a haya un splicacion amplio di e operacion di e avion aki ora di un horcan.
Pensando semper riba e desaroyo di nos siguiente generacionnan, Minister Romero a dicidi di invita un grupo di muchanan di scolnan MAVO pa mira e Hurricane Hunter Hercules di serca. Scolnan cu tabata presente tabata Ceque College, La Salle College, Filomena College y Abraham de Veer School. E muchanan a keda hopi contento di por a conoce e Hurricane Hunter WC-130J di serca y haya e splicacion cientifico di e trabounan cu ta wordo realisa y e importancia di e tipo di avionnan aki.
Minister Romero ta extende su palabra di gradicimento na Minister Zita Jesus Leito, Directornan di Meteo Aruba y Corsou, como tambe na e scolnan cu a copera pa e muchanan por a sali durante ora di scol pa conoce e Hurricane Hunter Hercules.