Diahuebs Parlamento a aproba e ley cu ta elimina cierto benficionan di e transparante vennootschappen den forma unanime. Ta trata aki di cierto beneficio fiscal, conoci specialmente den mundo financiero, cu no tabata rekeri pa cierto empresanan tin actividadnan economico real. Den su forma actual e transparante vennootschap no tabata cumpli mas cu reglanan di OECD como tampoco di Union Europeo. Gobierno di Aruba a compromete na december 2017 cu dentro di 1 aña, esta na december 2018, lo a pasa e ley aki den Parlamento unda cu lo inclui e criteria di ‘substance’, esta cu bo mester tin actividadnan economico real den e regimen fiscal en cuestion. No cumplimento cu e palabracion aki a conduci cu nos ta awe riba lista preto di Union Europeo.
Pa falta di duna e prioridad necesario na esaki, e ley aki a yega Parlamento na maart di 2019 y a ocasiona cu Aruba a termina riba e blacklist di Union Europeo y categorisa como huridicion cu no ta duna cooperacion pa loke ta trata transparencia den construccionnan fiscal. Segun Parlamentario di Fraccion di AVP, mr. drs. Richard Arends, esaki ta algo cu ta di lamenta. E prioridad di gobierno tabata pa pone e capacidad humano limita cu nos tin pa traha riba crisisheffing, un reforma fiscal cu no a resulta nada mas di ta un aumento di impuesto pa ciudadano y a laga esaki mas abou di linea cu a ocasiona cu Aruba ta riba blacklist.
E percepcion internacional di ta riba un bliacklist hopi mas dañino cu efectonan mes. Parlamentario Arends ta spera cu awo gobierno a compromete su mes di fija un grupo di trabou permanente cu lo por ta mas alerto ariba cambionan aki. Cambionan den e reglanan internacional ta sosode regularmente y si bin cambionan di ley pa nan yega na tempo na Parlamento.
Fraccion di AVP a asumi su responsabilidad y no a haci politica cu esey. Nan sa cu esaki ta na beneficio di Aruba. Fraccion di AVP a tuma nota di e carta di trustkantoornan cu obviamente cu no tabata informa di e cambio aki. A nota un falta di comunicacion di parti di Gobierno cu stakeholders.
Parlamento a inicia den e comision financiero economico un serie di consulta pa loke ta trata stakeholders den sector financiero di Aruba. Na momento cu e ley a yega, a scucha tambe esunnan cu ta traha den veld pa por haci un miho assestment y tuma miho desicionnan den sala.