Diamars 2 di april, Gobierno di Aruba hunto cu Fundacion Autismo Aruba a cende lus blauw na edificio di Bestuurskantoor como un muestra di comprension y aceptacion y pa aumenta conscientisacion na nos pueblo. Mundo henter a duna honor na e siman di Conscientisacion di Autismo pa reconoce e condicion aki y tur esnan cu tin’e.
Prome Minister Evelyn Wever-Croes na e ocacion a duna un discurso cortico na unda el a enfatisa cu meta di Gabinete Wever-Croes ta pa inclusion di nos hendenan special haya prioridad y esaki Gobierno di Aruba ta bas’e riba e Enfoke di Ciclo di Bida di hende, “Life Cycle Approach”, Esaki ta cuminsa desde cu un persona nace cu un limitacion fisico of mental. For di aki caba mester tin un bon sistema na luga pa asisti e mayornan y of e cuidador di e muchanan. E siguiente stap ta inclui e muchanan aki na scolnan adecua y ekipa pa cuida muchanan special. Tambe mester bin un bon plan pa despues di scol e muchanan aki tin un luga bon pa keda mientras nan mayornan ta traha. Ora nan drenta e edad hoben, mester percura tambe pa despues cu nan caba scol, nan por wordo inclui den un scol di ofishi. Tambe mester studia e posibilidad pa nan drenta scolnan regular.
Den nan edad di adulto, mester inclui nan den e mercado laboral. Algo cu lo no bay ta facil teniendo cuenta cu e presion cu tin awendia den comercio cu un economia stagna. Sinembargo Gobierno di Aruba, pa medio di e comision aki cu lo studia tur posibilidad, lo yuda den inclusion di nos hendenan special den e mercado laboral. Despues di e face laboral, ta bin tambe e parti di cuido di salud y vivienda.
Prome Minister a duna un comparacion di un pisca pa ilustra aceptacion na nos muchanan special:
“Un pisca ta desenvolve su mes bon den awa. Si bo bisa e pisca pa subi un mata riba tera, e lo no logra. Si constantemente bo ta reclama y huzga e pisca, pasobra e no por subi e mata, e pisca lo pasa henter su bida pensando cu el a faya. Cada ser humano tin su habilidadnan cu e ta bon den dje. Hendenan cu autismo tambe. Ta tarea y mision di nos tur ta haya sa kico nos hendenan special ta bon den dje y duna nan e sosten pa nan sigui desaroya y bira miho. Ban busca e bon den cada hende, y encurashe pa e ta miho, hasta si e ta total diferente na otronan.
Gobierno ta encurasha nos pueblo pa sigui yuda Fundacion Autismo Aruba pa asina nan por sigui trece conscientisacion riba e condicion aki pa asina Aruba por yega na un comprension y aceptacion completo pa cu e condicion aki. Fundacion Autismo Aruba ta haciendo un gran trabou pa conscientisa nos pueblo y nan tin mester di sosten di nos tur pa sigui haci nan campaña di conscientisacion.
Ministernan di Gabinete Wever-Croes y Parlamentarionan a reuni dilanti Bestuurskantoor pa ricibi e Fundacion, mayornan y famia di nos ciudadanonan cu autismo na unda a presencia e momento cu a cende e lusnan blauw pa duna conscientisacion na e dia importante aki.