Oranjestad – Fundacion Autismo Aruba (FAA) ta informa cu diamars, dia
2 di April Nacionnan Uni a declara Dia Mundial di Autismo. FAA un biaha mas durante henter luna di April ta organisa varios actividad pa concientisa tocante Autismo.
Aruba pa medio di Fundacion Autismo Aruba (FAA) ta uni cu tur organisacion di Autismo rond mundo riba 2 di April pa un ceremonia cortico di ‘Light it up Blue’ pa sende 7or di anochi luz blauw dilanti Bestuurskantoor. E ceremonia aki ta aki ta forma parti di un accion mundial cu ‘Autism Speaks’, e organizacion di autismo mas grandi na mundo y un partner strategico di FAA.
FAA ta haci un yamada na henter comunidad, scolnan, banconan y otro instancianan, pa e dia ey bisti na blauw, ya cu e color blauw (royal blue’) ta simbolisa Autismo. Tambe negoshinan por decora nan vitrina na color blauw y casnan tambe por decora cu luz blauw pa asina enfoca riba Autismo. E sendemento di luz ta culminacion di e celebracion di Dia di Autismo. Tur hende cu ta sinti nan mes envolvi cu Autismo ta invita pa participa diamars, dia 2 di April, pa 6.30 di anochi dilanti Bestuurskantoor ora ta bai sende e lusnan blauw. Esaki a bira posibel danki na Print Media, I love Aruba , High Performance y Gobierno di Aruba.
Dia 7 di april FAA hunto cu Movemento ta Bida y Patrishi Sports lo organisa e tan famoso Blue Race Run & Walk power up pa Subway, Kiwanis Club Palm Beach y Amsterdam Manor. E Blue Race Run & Walk aki ta di 1 miya y 5km y lo cuminsa 6’or di mainta y termina na Fisherman’s Hut. Registracion pa participa na Blue Race a cera ya cu a alcansa e cantidad di participante. Dia 6 di april ta Dia internacional di Actividad Fisico pa e motibo ey Movemento ta Bida a join e Blue Race, pa promove actividad fisico. Fundacion Movemento ta Bida lo regala un dryfit shirt na tur participante cu a registra, na final di e Blue Race. Fundacion Autismo Aruba ta gracidi Fundacion Movemento ta Bida pa e bunita gesto aki.
FAA actualmente tin un encuesta pa midi e conocemento y consientisacion riba Autism Spectrum Disorder (ASD). E lista di pregunta ta hopi simpel y ta solamente 10 pregunta. E encuesta aki ta hopi importante pa FAA. A base di e informacion aki FAA lo determina su maneho riba e consientisacion en general y gruponan afecta en particular. Pa medio di esaki FAA ta invita tur adulto pa bishita e Facebook pagina di Fundacion Autismo Aruba y yena e encuesta aki.
Ademas di tur e actividadnan aki FAA durante luna di april lo organisa workshop na varios organisacion y instancia pa duna informacion tocante con pa atende cu personanan cu tin ASD. Keda pendiente pa mas actividad durante di aña di FAA pa sigui consientisa nos comunidad riba Autismo.