MACUARIMA, ARUBA: Awe dialuna polis di bario di districto di Oranjestad conhuntamente cu personal di wijk –en woningbegeleidster di FCCA a cuminsa un proyecto di limpiesa den e bario di Bushiri. Recientemente a tuma lugar un reunion na unda tur dos partido a sinta hunto pa cuminsa cu proyecto den e bario di Bushiri.
E problema den e bario ta e hecho cu e residentenan ta haya molester di aglomeracion di cierto gruponan. Autonan bieu para riba caminda, tambe autonan sin number y /of autonan cu ta daña pa tempo largo cu ta para den e parkeerplaats cu ta destina pa esnan cu ta bibando eynan y tambe para riba tereno publico.
Durante e accion a kita 17 auto for di caminda publico.
Lo bay pone atencion na bendemento di droga den e bario, cacho cu ta cana los y hopi mas. Den e proyecto aki personal di FCCA conhuntamente cu polis di bario di districto di Oranjestad a bay over na informa tur e residente pa loke ta e accion cu a tuma lugar awe.
Tur e autonan para riba caminda publico cu nan number di auto no ta paga a wordo getakeld y hiba warda di balashi. E doñonan lo tin di bin cu nan papelnan na ordo y pa asina nan por haya nan auto bek.