Recientemente UNICEF Nederland na Den Haag a sinta na su turno cu Minister Glenbert Croes, Glenda Hernandez manager di proceso y ehecucion Sociaal Crisis Plan (SCP) y Parlamentario Sue-Ann Ras, presidente di comision di supervision SCP, pa duna nan recomendacionnan. Esaki ta despues di e 3 dianan di reunion na fin di februari, tocante evaluacion di e prome raportahe di SCP (Sociaal Crisis Plan), unda Marlies Filibri, teammanager pa Cariben UNICEF tabata presente y via social media su team na Hulanda tambe a presencia e reunionnan.
COLABORACION UNICEF CU SCP
Segun Parlamentario Ras e colaboracion aki sigur ta un tremendo oportunidad, ya cu asina UNICEF Nederland por brinda nos sosten y guia hopi mas specifico cu SCP p’e ta optimalmente implementa y cu meta duradero.
“E tema di nos crisis social ta mas visibel y awor ta tribi di papia y señala esaki. Mi ta gradici tur media tambe, cu porfin ta percura pa trece e casonan preocupante dilanti, demostrando cu echo cu pa hopi aña a neglisha e parti social enormemente y cu nos tin hopi trabou pa haci, pa busca e solucionnan mas efectivo y duradero pa cada caso”, Ras a cuminsa na bisa.
UNICEF RAPPORT 2012
Loke ta bon pa enfatisa y recorda segun Parlamentario Ras ta, cu for di 2011-2012 UNICEF a presenta un rapport traha pa OSE (Observatorio Social de Ecuador) basa riba e analisis di e situacion di mucha y hoben na Aruba. Esaki tabata un tarea cu UNICEF a duna, ya cu Aruba no tabata percura pa e derechonan di mucha y hoben ta completamente ehecuta. Un otro meta importante tabata pa bin cu e recomendacionnan pa iniciativa di medida social riba termino cortico, mediano y largo pa mehora nan circumstancianan di bida y oportunidad.
“Mas cu claro, mirando e magnitud di e casonan social di tanto aña y henter un cadena social, cu no a haya atencion profesional ni financiero, nos tin cu percura pa realisa e trabounan atrasa aki di e mihor manera posibel, pa asina implementacion y inversion di SCP ta un exito”, ta loke Parlamentario Ras a indica.
QUICK SCAN 2018
For di aña pasa, un biaha mas UNICEF a bin Aruba y a haci un quick scan di e SCP y e biaha aki si tanto e minister, gobierno y parlamentario Sue-An Ras a percura pa duna atencion y ehecucion di e recomendacionnan. Parlamento tambe tin su trabou pa ehecuta awor, ya cu nan a haya e relato di prome raportahe di SCP y diabierna 5 di april lo tin e reunion publico, unda e parlamentarionan por haci tur pregunta relaciona cu e implementacion di SCP. “Ta door di e transparencia y seriedad cu Minister Glenbert Croes conhuntamente cu Sra. Glenda Hernandez a demostra cu SCP, Aruba a logra haya ayudo financiero y asistencia tecnico for di Gobierno di Hulanda y UNICEF respectivamente. Sin laga afo e excelente trabounan profesional y transparente, cu nos profesionalnan den veld ta desplegando cu SCP”, Parlamentario Sue-Ann Ras a finalisa bisando.