ORANJESTAD – Minister di Salubridad Publico sr. Dangui Oduber a duna di conoce cu pa 1 di augustus 2019 tur casnan di cuido lo mester tin nan permiso cu ta obligatorio. E proceso pa haya e permiso aki despues cu manda un peticion aden lo bay relativamente lihe segun e Minister. Esaki ta pa motibo cu lo haci uzo di e systema di “Fast Track”.
Minister Oduber a splica cu a reforsa e ley di otorgamento di permiso pa casnan di cuido, haciendo esaki mas estricto. E gobierno aki semper lo para na bienestar di nos grandinan, poniendo e ser humano central. E meta principal ta pa mehora e calidad di cuido cu e casnan di cuido ta ofrece na e comunidad, asina e Minister a trece dilanti.
Diamars pasa Inspectie Volksgezondheid Aruba (IVA) a organisa un anochi informativo, aki a reuni cu tur e casnan di cuido. A splica tur e casnan di cuido over di e permiso obligatorio cu nan mester tin pa e fecha di 1 di augustus 2019. Si pa e fecha menciona esaki no ta na ordo, lo bay over na cera e lugar.