Den cuadro di bishitanan na Hulanda y Bruselas riba e consecuencianan cu e situacion di Venezuela por tin pa Aruba, awe a reuni cu sr. Paternotte (D66). Sr. Paternotte ta presidente di e comishon fiho di Tweede Kamer pa loke ta relacionnan den Reino.
IPKO 2019
Durante IPKO e 4 delegacionnan di Parlamentonan den Reino a palabra cu lo haci preguntanan na nan Gobierno pa haya sa cua aspecto cada pais mes lo atende cune y cua aspecto Reino mester aporta cune. Den cuadro di esaki Parlamento di Aruba a reuni cu Minister President y Minister di Husticia algun siman atras durante un “bijeenkomst” publico. Akinan a haya mas informacion riba desaroyo di Venezuela y e plan di Gobierno.
DEBATE PUBLICO RIBA VENEZUELA
Sr. Paternotte a splica cu su colega y vocero di D66 riba e tematica di Venezuela a solicita un debate publico den Tweede Kamer cu Minister di asuntonan exterior sr. Stef Blok. Prome cu e debate aki tuma lugar a palabra cu lo tin reunionnan cu delegacion di Aruba, pa asina atende tur punto di preocupacion door di coleganan Hulandes durante e debate aki cu Minister Stef Blok.
PA CONCLUI
Pa loke ta e reunionnan na Bruselas a palabra cu lo informa sr. Paternotte, como presidente di e comishon fiho di Tweede Kamer pa loke ta asuntonan di Reino, por escrito riba resultado di e reunion. Asina aki Parlamentarionan Hulandes por trece esaki na atencion di e secretario di Estado sr. Knops y Minister di asuntonan exterior Sr. Blok.
E reunion cu sr. Paternotte a bay den hopi bon esfera y ta mustra cu tin comprension pa e situacion di Aruba y Corsow. E delegacion Arubano lo reuni mayan tambe cu Minister di asuntonan exterior sr. Stef Blok .