Parlamentario Endy Croes a splica cu el a scucha algun parti di conferencia di prensa di AVP siman pasa unda Mike Eman a reaparece despues di tabata keiro na universidadnan na Hulanda. Mike Eman, sinonimo na HANANIAS, esta un profeta manipulador kende a indoctrina un pueblo na un forma masha manipulador contra Rey di Babilonia tabata na palabra y nos lo cita parti di su ponencia. Mike Eman a elabora riba e reforma fiscal y a splica: “Reforma Fiscal di un hende cu ta gana Afl. 2000 a haña Afl.22,- di reduccion riba su belasting. Mike ta sigui splica cu gastonan solamente riba cuminda a aumenta cu 11%. Pues Mike Eman ta haci un calculacion pa pueblo cu di Afl.2000 cu un ciudadano ta cobra e ta cumpra na cuminda Afl.1400,-pa luna. Mike su ponencia ta cu 11% di Afl.1400 florin (cumpra na cuminda) pueblo ta bay atras cu rond Afl.150 florin”.
Ponencia manipulador di Mike Eman
Parlamentario Endy Croes ta bisa cu akinan ta mustra claramente con Mike Eman ta hunga na un manera manipulativo cu e sentimento di pueblo. Mike Eman kier haci un comparacion y ta splica cu “cada conciudadano” ta cumpra Afl.1400 florin pa luna na cuminda. Esaki ta e forma di manipulacion sin credo. Segun Parlamentario Croes pa contraaresta e locura di Mike Eman y pa pueblo kisas compronde mihor lo amplia cu un splicacion y comparacion. Si un solo persona come 30 dia den restaurant den un luna y e paga Afl. 30 florin na Chines pa dia pa su cuminda esaki lo alkansa Afl. 900 florin den un luna. Esaki ta un ehempel di mas caro. Croes ta splica cu ta practicamente imposibel pa un solo persona cumpra Afl.1400 florin pa luna na cuminda. Segun ponencia di manipulador Mike Eman si ta dos hende ta biba den cas esaki kiermen cu nan dos lo cumpra 2 ves 1400 florin na cuminda esta un suma di Afl. 2800 florin den un luna. Mike Eman por bay FLIET cu su ponencia asina “bobo”. Esaki ta e forma di Mike Eman di manipula un hende cu cifra. Ta imposibel pa scucha un ex Promer minister di un pais papia semehante disparate asina y kier substanci’e cu cifranan na un forma totalmente incorecto. Ta imposibel pa kere cu hende ainda por tin confiansa den Mike Eman y AVP.
Desaster laga atras na 2017
Ta comprendibel si awor dicon Aruba ta den un abismo asina na e forma cu Mike a maneha e pais. Mike ta kere cu pueblo lo a lubida e desaster financiero cu el a laga atras? Mike ta kere cu pueblo lo lubida cu el a redobla e debe nacional di pais Aruba (41.7% na 2008) pa 90% na 2017? Mike ta kere cu hende por lubida e Mega Debe cu el a crea casi mandando e pais aki bancarota? Mike ta kere cu pueblo por lubida cu mester bay paga pa 20 aña largo 80.9 MIYON pa aña pa su proyectonan di locura PPP? Mike por kere cu pueblo por lubida asina liher con el a masacra Aruba redoblando tambe e interes cu pueblo ta paga riba prestamonan haci door di Mike cual a alcasando 219 MIYON den 2018. Esaki ta igual na 600 mil florin pa cada dia. Un abusador so por maltrata un pueblo na e manera aki creando debe y mara man y pia di nos futuro generacion. Mike por kere cu pueblo lo lubida asina liher con Mike a saca 142 mil florin di pueblo pa celebra su cumpleaños dia 1 di september 2017 promer cu eleccion riba e brug? E mesun homber humilde cu Mike Eman ta referi na dje cu un salario minimo di 1700 florin pa luna mester traha 7 aña largo pa acumula un suma di Afl.142 mil florin cual suma Mike a malgasta den un solo anochi fiestando su cumpleaños. Mike kier bin bek pa sigui desgracia y horta e comunidad aki? Nunca pero nunca mas AVP.