Tin biaha bo ta pensa 100 biaha pa reacciona of no riba parlamentarionan manera Mervin Wyatt-Ras cu te dia di awe ta haci hopi daño na e instituto parlamento pero tambe na pais Aruba principalmente pa su mal funcionamento cu a causa cu awendia nos conoce un debe nacional di 90% di nos GDP y tambe ta parti di a acepta y percura pa corupcion y hasta pa un minister por a keda cera y tambe cobra te dia cu gobierno a bay cas.
Un biaha mas cu wega infantil di quorum
Ora cu mi a drenta parlamento mi a huramenta dilanti Gobernador di Aruba. Mi a hura pa sirbi mi pais pues mi tin di sirbi interes di cada ciudadano na Aruba. Y sigur prome cos cu mi a pasa den dje tabata mi reglamento di ordo. Den esaki ta para claramente cu parlamento di Aruba ta forma pa 21 miembro. Y pa forma quorum mester di 11 parlamentario. Anto e mentalidad di Mervin ta locual a haci hopi daño na Aruba pa su actonan infantil enbes di controla gobierno. Esaki ta e muestra di e practica di pasado unda ta sali laga reunion y e mes tabata parti di esaki y cu mi ta condena y cu a bolbe pasa unda cu Mervin ta forma parti di esaki. Nos ta 21 miembro di parlamento cu ta cobra mesun salario y ta pueblo ta paga nos y nos tur tin e mesun responsabilidad pues di ta presente na reunion cu excpcion pa motibo di malesa of otro circunstancianan for di nos control. Pues atrobe mi no ta compronde e insinuacion infantil di duna quorum, pasobra ta bo deber di ta presente. P’esey mi persona ta trahando pa trece cambio den reglamento di ordo pasobra no por keda cu actitud infantil cu ta daña nos imagen como parlamentario y sigur ta pone nos cara na berguensa serca otro instancianan
Quorum internacional
Ta parce cu na Aruba nos no kier asumi nos responsabilidad di tene reunion cu mayoria y ta bin cada bes cu e storia cu un fraccion esta di AVP tin di duna quorum pa tin reunion mientras nan ta ser paga pa atende reunion y esaki ta pakico mester aplica e medida di ‘no work no pay’. Straño ta cu recientemente Mervin manera Serafina a bay representa Parlamento di Aruba den e comision di IPKO na Surinam. Ey si sra. Mervin a forma quorum trankil sin keha, pasobra ey si e ta parlamentario di Aruba, mientras na Aruba e ta parlamentario di fraccion di AVP. Cu esaki mi kier ilustra con tin falta di respet pa pueblo cu unda cu den exterior trankilmente ta forma 11 of mas miembro y ta carga e titulo di parlamentario di Aruba pero ora nos ta na cas nan ta falta respet na pueblo, esnan cu ta paga nan biahe y nan salario door di boicotia reunion publico cu ta na interes di pueblo y p’esey pueblo tin di bis’e ora top’e cu nan ta paga su salario y nan kier wak e respeta nan y atende reunion manera un hende serio y madura.
Caso IBIS
Mi ta puntra mi mes ki sra. Mervin Wyatt Ras tin di bisa di e caso IBIS. Pasobra ta su mesun persona un biaha mas a duna muestra di no ta haci su trabao segun su consenshi pero ta ser instrui, unda cu a aproba cambionan den e concepto di ley di screening/integridad minister, pa acomoda un ex Minister cu tabata cera. Pues esey ta muestra di falta di integridad pero sigur falta di actitud pa por a para e practicanan coruptivo di nos pais. Ki nos tin di pensa??