Parlamentario di fraccion di AVP, mr. drs Richard Arends a mustra durante di e reunion publico relaciona cu desaroyonan encuanto e supervision financiero cu Gobierno no a duna informacion riba kico por spera di e cambio di ley cu ta regla e supervision financiero nobo, LAFT.
E meta di e reunion cu a wordo yama pa Presidente di Parlamento tabata pa haya un idea di kico por spera cu e cambio di ley di supervision financiero nobo cu ta cubri un area mas extenso di loke ya caba tabata e ley di supervision anterior. Segun e Sr. Arends, preguntanan cu a wordo haci no a wordo contesta di un manera satisfactorio.
El a para keto riba e declaracion di minister unda cu en berdad Parlamento tin tur autoridad pa cambia tur ley. Hecho ta cu Gobierno a compromete su mes cu ta solamente e normanan pa presupuesto di añanan 2019 te cu 2022 lo wordo actualisa. Sinembargo e protocol ta contene hopi mas cu esey.
“Den caso cu Gobieno cambia mas cos den e ley di supervision financero, of si Parlamento haci uso di su derecho di amienda pa cambia e ley di supervision financiero, kico lo sosode? Gobierno no a duna Parlamento contesta riba e caso specifico aki,” Sr. Arends a bisa.
“Berdad c’un protocol no por limita e poder di Parlamento, pero na momento cu e ley mester bin bek of wordo ahusta di nobo e ta afecta e posicion di Parlamento grandemente.”
“Irespecto di e signatura politico, ta na cada Gobierno pa dicidi con fondonan publico ta wordo aloca y pa Parlamento duna autorisacion y aproba esaki,” Arends a splica. A base di e palabracionnan nobo, Parlamento por aproba un presupuesto cu ta cumpli cu e normanan stipula den LAFT, pero CAFT ainda por duna un recomendacion na Conseho di Minister di Reino con Aruba a logra e norma.
“Esaki ta pone Parlamento un banda, CAFT ta haya autoridad pa traha pafo di e cuadro legal y Conseho di Minister di Reino ta haya competencia caminda cu e no tin,” Arends a subraya.
En bes di haci uso di e oportunidad pa di manera pro-activo miembronan di Parlamento por contribui na futuro di supervision financiero, Gobierno a bisa cu Parlamento mester warda e ley wordo presenta oficialmente. Na es momento Gobierno ta preparando e fase di contesta despues cu Raad van Advies a duna su conseho. “E fase aki por dura un pa dos dia pero e por tarda 25 aña tambe.” Tanten cu e ley no ta formalisa y no wordo trata, ta e protocol cu gobierno a firma lo ta e cuadro den cual CAFT lo haci su supervision poniendo Parlamento completamente un banda,” Parlamentario Richard Arends declara.
Hopi biaha ta tende cu e normanan anterior no a funciona y sr Arends ta puntra ki garantia tin cu e normanan nobo aki lo haci un diferencia. “95% di gastonan di gobierno ta gastonan structural y no tin ningun distincion haci kico ta gastonan structural y kico ta gastonan incidental. Tampoco no tin un separacion estricto den nos sistema administrativo di kico ta entradanan structural y na ki momento un entrada ta wordo considera como incidental. “