Dia di concientisacion pa yuda hobennan anda responsabel durante periodo di Carnaval
ORANJESTAD – Diamars mainta MAVO Juliana School tabata tin nan “Dia di Concientisacion” pa yuda hobennan ta conciente tocante posibel influencianan negativo cu por tin durante temporada di carnaval.
“Nos a compronde cu FADA ta organisa esaki pa varios aña caba na diferente skol y esaki ta prome aña cu Juliana School ta participa. Nos ta mira aña pa aña cu durante e periodo di carnaval tin hopi incidente cu ta encera hobennan cu tin di haci cu droga y alcohol. Dus e Carnaval, cu ta parti di nos cultura, toch ta keda bin cu su influencianan negativo y nos kier a para keto y duna e hobennan informacion valioso pa yuda nan anda den e periodo aki sin cu por tin consecuencianan lamentabel, asina nos a hinca nos programa “Carousel” den otro pa duna informacion di diferente instancia,” Decano y docente di Hulandes, Germaine Geerman a bisa.
“Wit Gele Kruis tambe a comparti informacion valioso tocante di influencia di alcohol ariba baby y tocante embaraso hubenil. Duana a comparti tocante droga y a duna varios ehempel di casonan pa evita; manera den caso cu un hoben ta biahando pa no tuma pakete pa hiba como fabor, pa un otro pais sin a wak kico tin den e pakete, ya cu esaki por ta droga y lo por tin consecuencia hopi negativo pa e hoben su futuro.”
“Nos como docente tambe a haya lectura di John Boekhoudt di OC – Ortopedagogisch Centrum cu ta cay directamente bou di organisador di Carousel – FADA. Otro lectura cu nos como docente tambe a yega di haya for di docente Sharleen Tromp den pasado tocante tipo di personalidad, nos a haya di hopi importante pa incorpora den e programa. E ta cuminsa cu un asignacion pa por identifica e tipo di personalidad cu e hoben ta cay aden a base di informacion ricibi. E ta pone bo para keto un rato na bo mes pa compronde dicon bo ta manera bo ta, y tambe bo relacion cu otronan pasobra e ta defini e diferencia den e diferente personalidadnan cu tin, y cua di nan lo funcciona miho cu otro na momento di traha den ekipo.”
“E ta algo cu nos por usa cu nos alumnonan. Den e aspecto mas amplio, e ta algo cu ta lanta interes y duna direccion den cierto area di estudio pa cu nan direccion profesional. Despues, cerca Duana tambe a bin hopi pregunta tocante e opleiding di e orador y tambe na diferente di e otro oradornan, hobennan a puntra kico nan tin cu haci si nan ta interesa pa tambe yega eynan. Awe nan a haya un ‘chispa’ di e material di ‘tipo di personalidad’ pero mi ta kere e lo ta mas fructifero si nan haya mas di e material di personalidad.”
Geerman ta bisa cu despues di e resultado di a participa na e Carousel di e aña aki, e ta apoya pa nan di Julana School participa na e Carousel tur aña.