Kralendijk – Colegio di Supervision Financiero di Boneiro, St. Eustatius y Saba (Cft) a pidi tanto Colegio Ehecutivo como Conseho Insular pa mustra mas dinamismo den realisacion di e intencionnan di maneho y e accionnan di administracion financiero. Cft ta constata cu den e ultimo añanan no a haci uzo di demasiado recurso financiero, mientras cu riba varios tereno di maneho e mehoracionnan necesario no a tuma luga. Door di trece ordo den e maneho financiero ta traha pa logra un ciclo di presupuesto y hustificacion na tempo y confiabel.
E cifranan preliminar ta mustra cu Boneiro a realisa un surplus di aproximadamente USD 12 miyon pa aña 2018. En comparacion cu e presupuesto di 2018 e entradanan ta aproximadamente USD 3 miyon mas halto y e gastonan aproximadamente USD 9 miyon mas abou. Riba casi tur tereno di maneho no a haci plenamente uzo di e recursonan disponibel. Cft a conseha Colegio Ehecutivo pa percura awor pa e cuenta anual di 2018 ta cla na tempo, di moda cu ainda por haci Conseho Insular un proposicion pa gasta e placa cu a keda den lachi. A tene combersacion cu Colegio Ehecutivo tocante e posibilidadnan pa logra cu den 2019 si ta ehecuta plenamente e intencionnan di maneho cu a incorpora den e presupuesto.
Na november 2018 a firma un acuerdo administrativo entre Estado Hulandes y Boneiro. Cft lo supervisa ehecucion di e palabracionnan pa mehoracion di e maneho financiero y a ricibi un splicacion aclaratorio di Colegio Ehecutivo tocante e situacion actual. Cft a acorda cu e plan di mehoracion actual di e maneho financiero lo keda finalisa na februari 2019. Esaki ta importante, pasobra a palabra cu Boneiro cu e cuenta anual di 2021 lo haya un declaracion aprobatorio di accountant.
Tambe a papia tocante e empresanan publico. E empresanan aki ta ehecuta tarea di gobierno y nan bon funcionamento ta, pues, di gran importancia pa e ciudadanonan. Cft a pidi pa percura pa mehoracion di e gobernacion y pa cumpli cu e palabracionnan al respecto den e acuerdo administrativo. Specificamente a papia tocante ekipacion completo di personal di e huntanan di comisario y e compilacion y presentacion na tempo di e cuentanan anual. Tambe den e caso aki dinamismo a corto plaso ta esencial.
Durante e bishita di Colegio diamars dia 19 di februari a papia cu Gezaghebber, Colegio Ehecutivo y Conseho Insular.