Diabierna 15 di februari, Prome Minister Evelyn Wever-Croes a ricibi bishita di Shariska Winterdal. Pa e Premier di Aruba ta un encurashamento y inspiracion cu hobennan door di nan persistencia ta logra cosnan grandi lagando ehempel tambe pa demas hoben riba nos isla. Shariska Winterdal na december ultimo a logra un hazaña deportivo fantastico door di core 500 km riba bais den 24 ora y 27 minuut. Na e ocacion, Prome Minister a entrega Shariska un bunita recuerdo di Hende Muher di Excelencia.
Prome Minister: “Locual cu a inspira mi hopi di e experiencia di Shariska Winterdal y e hazaña di 500 km ta e determinacion cu e tin. Ora e pone un meta, e ta bay p’e y no ta laga ningun hende strob’e. Persistencia! Ki bunita ehempel pa nos hobennan. Ta su pasion y determinacion a pone henter un comunidad uni y para su tras, sostene, y stimule. Union! Ki bunita ehempel pa nos comunidad. Y tur esaki pa yuda otronan”.
Cu e hazaña aki, Shariska a recauda fondo pa yuda Fundacion Frank Polanco cu ta yuda huerfanonan.