Ta hopi tempo San Nicolas a wordo lubida den desaroyo economico social unda cu nos tin e desempleo di mas halto na Aruba y consecuentemente e indice di pobresa mas halto. No por tapa solo cu un dede. No por yega na desaroyo anhela den un tempo relativamente cortico. Nos industria turistico tawata un proceso di mas di mey siglo. Pa San Nicolas esaki lo no ta diferente.
Hopi argumento di e tamaño di hotel di 600 camber All-inclusive y 300 European plan. Gobierno anterior Gabinete Mike Eman ta esun cu a buta e trampa un bes mas pa nos digno pueblo. Ta nan a firma pa varios hotel All-inclusive di un magnitud grandi, sin tene cuenta cu e deseo di nos pueblo. Gobierno actual a renegocia e hotelnan pa por yega na un ‘win-win situation’.
San Nicolas tin un oportunidad di oro pa cuminsa traha riba su infrastructura, servicionan y comercio en general cu un proyecto macro turistico asina. Pa ora cu incentivonan fiscal ta cla y e introduccion di mas oportunidad pa small business pa habitantenan di pariba esaki lo sigur crea e clase media cu poder di compra cu Aruba mester di dje pa un spin off economico real. Preocupacion di carrying capacity, medio ambiente y otro impactonan mester haña nan debido atencion pero no por wanta un pueblo atras pa motibonan anti-progreso pa un grupito den nos pais si gosa di e prosperidad cu turismo a trece nos pais. No tin niun otro alternativa real sino mas di proyectonan fantasma manera Green Conference y Europe meets America y awo hasta ta papia di industria di barco pero nada nada concreto. No tin tempo pa perde mas. Ban uni y ban usa nos recursonan pa duna San Nicolas su fairshare. “Ni un paso atras.”