Palm Beach: Diahuebs den oranan di anochi, durante cu un chauffeur di Arubus tabata coriendo riba e routa di Palm Beach pa Oranjestad, e ta haye den un problema cu tres turista, cu no por a comportanan manera debe ser, cu te hasta mester a pidi pa presencia di polis.
Diahuebs anochi, e tres turistanan aki consistiendo di dos muher y un homber a drenta den e bus, nan a cuminsa haci fastioso, te hasta lo a hinca man den placa larga di e chauffeur di bus, despues nan a bay sinta patras y a sigui haci fastioso, e chauffeur varios biaha mester a hala nan atencion, a cansa di nan comportacion cu mester a yama polis, pero net prome cu polis a yega, nan a baha caba for di e bus y polis no a topa cu nan.
Diabierna durante cu e chauffeur di bus tabata coriendo un biaha mas riba e mesun ruta, ela bin mira e trio fastioso aki na altura di Paseo Herencia. Na altura di Marriott Beach Resort e chauffeur di bus ta topa cu polis y ta splica polis tur loke a pasa, tambe con nan tabata bisti y unda ela miranan.
Mesora polis a bay direccion di Paseo Herencia y a logra topa cu e tres turista nan aki. Na prome instante e trio aki a trata na tuma polis haci, haciendo weganan infantil, pero e agentenan policial no a cay den nan weganan y a atende nan riba nan comportacion di e dia anterior. No tabata necesario pa detene nan, pero si a bisa nan cla y raspa cu autoridad tin bista ribanan, cu cualke cos cu nan haci nan lo por keda deteni.