Parlamentario Endy Croes ta reacciona riba un articulo publica pa CBN (Canadian Bank Note) algun dia atras den un matutino sostenedor di Mike Eman y AVP cu masha poco penetracion, esta Awemainta. Den e articulo aki CBN a publica diferente redashi cual ta leu di berdad. CBN a falta respet pa Minister di Deporte Sr. Danqui Oduber cu su acusacionnan for di sla. No solamente esaki pero sinceramente esaki ta un falta di respet pa gobierno den su totalidad. Den e mesun articulo aki Canadian Bank Note a ataca Parlamentario Endy Croes. Na un manera hopi manipulador Craig Bascombe kende ta e Presidente di CBN pa locual ta trata Lottery System ta skirbi of a laga skirbi textualmente “cu Endy Croes mes no ta splica cu Endy a ricibi Afl. 880.000 pa luz na Kudawecha (pues ocho cien y ochenta mil florin, que locura) y ademas un otro Afl. 44.000.
CBN ta mete la pata den politica
Ora CBN mediante Craig Bascombe cuminsa mete la pata den politica di Aruba na un forma di manipulador mesora nan status ta wordo poni riba hendenan “NON GRATA” pa e Gobierno aki. Imposibel cu un multinacional ta mescla su compania cu politica local y ta permiti nan mes pa trece mentira dilanti na un manera manipulador. Parlamentario Endy Croes mester agrega en realidad el a traha pa 8 aña hopi di cerca cu e compania CBN. CBN ta un compania multinacional di Canada cu ta traha entre otro paspoort pa mas di 80 pais rond mundo, tur tipo di security documents, print placa entre otro US Dollars y un area chikito di nan ta maneha sistema di Loteria. Pues cu e experencia cu Endy Croes tin casi ta imposibel pa imagina cu CBN por a expresa algo asina den corant di Toko Winklaar, un AVP raha. No ta descarta cu Toko y Teragroup ta tras di esaki usando logo di CBN. Esey ta un practica masha normal pa defensornan di maldad, esta defensornan di AVP.
Ta exigi un carta di disculpa
Nos tur por corda recien con Mike Eman a usa Logo di Banco Central cu tabelnan cu su mes a traha cual Banco Central a condena y den un comunicacion categoricamente a rechasa e tabel cu Mike Eman a usa cu no ta un tabel produci pa Banco Central. Pero pa awor como cu e articulo manipulador aki a sali cu logo di CBN, esta Canadian Bank Note nos lo tene CBN y su presidente Craig Bascombe personalmente responabel y ta exigi un carta di disculpa tanto na Minister di Deporte Dangui Oduber y mi persona como Parlamentario di Pais Aruba. CBN bao di e maneho di MEP 2001-2009 tabata cobra 8% di benta bruto pa nan trabao, esta pone tur e terminalnan, controla esakinan, maneha e programa y software pa Lotto etc. Por ehempel na 2009 momento cu MEP a sali for di gobierno a laga un benta bruto atras di 42 Miyon florin pa cu e aña ey. Di akinan CBN a cobra pa management fee 8%, esta alrededor di Afl. 3.3 MIYON pa cu aña 2009.
AVP a bende Lotto cu Canada
Manera AVP a drenta gobierno, pa falta di vision y yena cu odio nan a bende Lotto cu Canada unda Canada ta draai e operacion y ta duna Aruba un miserabel 4 Miyon pa aña pa Deporte. E contracto aki ta vigente te 2027. Tristo Aruba! Den 2014 Canada a cobra Afl. 11.5 MIYON na management fee. Pues 23% di e benta cual ta absurdo y un locura total. Enbes cu CBN mediante su presidente Craig Bascombe sinta gaña y manipula riba Minister di Deporte y Parlamentario Endy Croes lo ta bon pa CBN splica pueblo dicon nan ta “rip off” pueblo di Aruba na e manera aki. E placa ta pa nos deportistanan y mester yega na nos deportistanan y esaki lo sigui ta nos lucha.
Terminando Parlamentario Endy Croes ta bisa cu apesar cu e no por kere cu CBN ta mescla nan mes den politica di un pais treciendo shisheria cu no ta cuadra cu berdad dilanti y faltando respet pa Mandatario y Parlamentario, pa awor e lo tene CBN responsabel como cu e articulo a carga e logo di CBN, pero alaves lo acepta un disculpa y splicacion di parti CBN pa clarifica esaki.