ORANJESTAD – ,Durante e manifestacion cultural anochi riba Plaza, a wordo presenta un obra teatral ‘Betico’ skirbi y dirigi pa sra. Lilia Luidens. Actornan den e obra tabata sr. Richard Dabian, Sra. Fatme Riguad y e hobennan Melanie, Kyan y Kayden.
E obra ta basa riba un storia na unda Papi Richard y Mami Fatme ta asisti na e celebracion di Dia di Betico riba Plaza hunto cu nan tres yiunan E muchanan kiersa pakiko ta celebra Dia di Betico y e mayornan ta conta Ken ta Betico.
Betico tabata un persona, cu door di su humildad tabata masha stima den pueblo. Un gran estadista cu conocemento grandi riba tur tereno, cu ela adkiri lesando bukinan di sabio- y politiconan famoso, luchador y libertador di nan pueblo. Den e obra e muchanan ta mustra nan interes y kier haya sa mas di Ken ta Betico. E Mama y Tata ta sigui conta con den su discursonan Betico semper tabata uza hopi expresion, cu semper lo keda graba den nos pueblo su memoria.
Betico a haya inspiracion di frasenan famoso di figuranan manera: Simon Bolivar, Abraham Lincoln, Benito Juarez, Jose Marti, Omar Torrijos, Winston Churchill, Che Guevara y Emiliano Zapata. Betico tabata sa hopi di nan dichonan y ta usanan na momento corecto den su discursonan y tabata captiva henter e pueblo di Aruba, di Antias, di Hulanda y di tur pais cu el a bishita pa haya oido pa su causa.
Den e obra por capta e mensahe cu Betico a inspira grandi y chikito. Un di e lesnan cu el a siña e pueblo ta: Nunca rindi: sigui lucha pa bo ideal, pa logra locual cu bo ta kere den dje.
Betico tabata un politico sincero y su lema tabata: Bo tin cu realisa cu bo ta traha pa pueblo, no pa propio interes. Betico tabata masha leal cu henter e pueblo, e no tabata distingui rasa ni edad, ni pober, ni rico. Ken cu a acudi cerca dje, el a atende cu santo pasenshi y comprension. Betico tabatin un memoria fotografico y tabata corda tur hende. Apesar di tur logro y popularidad el a keda hende di tur hende y el a sa di duna tur politico Arubiano nan balor den historia di nos isla keri. personal. Betico, un persona multitalentoso, un artista, un musico, cantor di su pueblo, homber religioso, e heroe di nos Aruba.
Durante e obra e Tata Richard y Mama Fatme ta siña e muchanan algun di e frasenan famoso cu Betico tabata uza durante su trayectoria politico: Veni, vidi, vici (Julius Ceasar); Los perros ladran y la caravana pasa (Proverbio Arabe cu a uza den e poema: El Labrador di Goethe); VOX POPULI, VOX DEI! Voz di Pueblo ta voz di Dios. No por ignora voz di pueblo; E libertad di un pueblo no ta un privilegio ni un regalo pero un DERECHO SAGRADO!”
E muchanan a siña cu Betico a percura pa un berdadero union den e pueblo Arubano. Esaki a haci cu Betico a crece como un persona admira y stima den wowo di e pueblo Arubano. Dia di Betico, Aruba ta di fiesta, danki na Betico, nos isla a haya su deseo anhela: Nos Himno, Bandera, Nos Escudo y nos bos.
Na final di obra, Mayrien Correa, a canta e cancion “Nos Heroe” un wals y composicion di Lilia Luidens cu a wordo acompaña pa e orkesta dirigi pa Johnny Scharbaay.
Minister Sra. Ruiz-Maduro ta gradici Sra. Lilia Luidens pa su bunita y emotivo obra, e actornan Richard, Fatme y e muchan Melanie, Kyan y Kayden. Como tambe Maybeline Arends- Croes pa e parti musical. Cu presentacion di e Obra teatral “Betico”, nos pueblo a conbibi di cerca un parti di e historia y lucha hiba pa nos Libertador y esaki ta contribui pa e memoria di Betico Croes keda bibo den nos pueblo”