Parlamentario Endy Croes ta reacciona riba Marlon Sneek riba su conferencia di prensa ultimo. Marlon Sneek manera custumber a keda pega den “reverse” esta den pasado. Mescos cu AVP a manipula cu nan lo elimina BBO ripitiendo esaki mas di 1000 biaha cual a pone un parti di pueblo a kere den nan cantaleta, awe nos tin un Marlon Sneek, un politico “kima” y “fracasa” purbando di usa mesun strategia pa mira kico lo por pega.
Critica barata di Marlon Sneek
Durante su ultimo conferencia di prensa Marlon a critica cu Minister di Finansa a anuncia cu ta aumenta e canasta basico. Enbes di Marlon Sneek papia di e contenido el a cuminsa papia di e documento cu Minister di Finansa tabata tin den su man cual a wordo imprimi cu tin e informacionnan riba dje. Segun Marlon Sneek textualmente ”Mi kier papia di e bunita flyer aki unda gobierno ta coy placa di pueblo pa traha e flyer aki y despues pone den corant y otro medionan”. Segun Parlamentario Endy Croes net Marlon Sneek tin e pudor di critica pasobra gobierno a traha un flyer pa informa pueblo. Gracias a Dios cu e Coalicion aki tin decencia y nan pianan ta na tera y firme y no manera esnan di AVP kendenan tabata bula cu hala di manteca y kere cu nan ta untouchable, esta burachi di poder.
Previlegio pa compinchinan di AVP
Marlon Sneek por splica pueblo dicon AVP tabata privilegia Tera Group di Patrick Paskel y Speed kendenan a ranca mas di 5 miyon di caha di gobierno na propaganda? Ta e mesun grupo aki amigonan di Marlon Sneek y AVP a ranca tambe mas di 1.5 MIYON on top di esaki for di companianan estatal manera Utilities, Elmar, RDA pa nombra algun. Marlon tin tur derecho como Parlamentario pa manda puntra cuanto placa e flyer cu Minister di Finansa tabata tin den su man a costa pueblo y cuanto e campaña den media lo sali. Mi ta garantisa Marlon cu no tin abuso manera e gobierno di AVP cual Marlon a sostene ciegamente ultimo 8 añanan. Ta net AVP tabata e “master of disasters” den tipo di cosnan asina.
Politica anticua y sin rumbo
Parlamentario Endy Croes ta purba pensa kico Marlon Sneek kier logra cu su politica sin rumbo, anticua y barata asina? Pero mesora nos ta refresca Marlon Sneek su memoria. Marlon Sneek por informa pueblo ken tabata produci e revista super glossy Aruba Dushi Tera? Marlon por splica pueblo cuanto ehemplar tabata wordo imprimi? Marlon por informa pueblo cuanto esaki tabata costa pais Aruba? Marlon por informa pueblo kico ta e balor adicional di e revista aki? Anticipando cu Marlon lo “chicken out”atrobe y no lo contesta, Parlamentario Endy Croes mes lo splica pueblo di e berdad di AVP.
Marlon, un berguensa pa comunidad
Pueblo ta corda e revista Aruba Dushi Tera ful na color cual tabata gaba proyectonan fantasma di gobierno di Eman 1 y 2? Wel pueblo no spanta. Esun cu tabata tin e contracto aki ta un tal Rene Zwart. Rene ta intimo amigo di Mike Eman. “Soort zoekt soort”. Nan tabata imprimi un total di 15 mil (15.000) copia pa luna. E proyecto di sinberguensa aki di Mike Eman y Rene Zwart tabata costa Aruba 214.000 florin pa aña y alrededor 1.7 MIYON florin durante e gobernacion di Mike Eman. Akinan Marlon Sneek a para wak? Marlon a aproba tur e cosnan aki bao di su nanishi den Staten. Simplemente AVP a complace su amigo Rene Zwart cu tipo di locuranan asina cu placa di pueblo pa defende nan maldad. Por a tuma nota di cantidad di copia di e revistanan aki tabata wordo tira afor na dump cada luna. No ta tristo Marlon? Por compara algun A4 na color cu 11000 revista ful color? Pues awe cu Minister ta print algun A4 na color pa splica pueblo con gobierno a amplia e canasta basico net abo cu a permiti tur e ladronicianan cu placa di pueblo tuma lugar den Rene Zwart Gate kier protesta sin base? Marlon Sneek ta un berguensa pa nos comunidad y ta un fracaso total pa e politica di Aruba. Kisas ta tempo pa Marlon Sneek pensa riba un retiro permanente, Croes ta termina bisando.