“Ora nos traha hunto, ta mas fuerte so nos ta bira”.
Diahuebs na Bestuurskantoor, a tuma luga e di tres cumbre entre e Prome Ministernan di Aruba, Corsou y Sint Maarten. Prome Minister Eugene Rhuggenaath di Corsou, Prome Minister Leona Marlin di Sint Maartin y Prome Mininster di Aruba, Evelyn Wever-Croes ya caba tawatin dos cumbre di e tres Premiernan. E prome a tuma luga na Corsou y e di dos a tuma luga na Sint Maarten durante e conferenica di resiliencia october ultimo.
Meta di e reunionnan aki ta pa estrecha lasonan entre e paisnan di Reino y traha hunto riba diferente terenonan teniendo cuenta e sistemanan di ley di cada pais. E tema di integridad a wordo trata na unda cu Prome Minister Evelyn Wever-Croes a duna un resumen di tur locual Aruba ta haciendo riba e tereno aki incluyendo e Bureau di Integridad cu a wordo institui prome di october ultimo cu a duna paso tambe pa e prome conferencia di Integridad na Aruba. Prome Minister a elabora tambe riba tur e trabounan cu Gobierno ta haciendo pa yega na e Camara di Integridad.
E crisis migratorio di Venezuela tawata un tema cu a haya basta atencion den e reunion aki teniendo na cuenta di e escalacion di e situacion actual di Venezuela. Aruba, Corsou y Sint Maarten ta wordo poni bou presion debi na e situacion aki. Gobiernonan di e tres paisnan den Reino ta deliberando na un base constante pa wak con ta e miho manera pa trata cu e problematica di migracion.
Varios otro tema a haya atencion durante e reunion trilateral entre otro; e Crisis Plan Social na unda cu Prome Minister di Aruba a splica e maneho cu Gobierno ta hibando riba e tereno aki tambe.
Prome Minister Evelyn Wever-Croes: “E tercer cumbre aki tawata uno hopi exitoso atrobe cu a dura henter e dia den discucionnan al caso y productivo na unda hopi informacion a wordo comparti. Especialmente, e cumbre a wordo dirigi riba mas cooperacion pa traha hunto. Cu e cumbrenan aki, no kiermeen cu nos ta perde nos autonomia. Ora nos traha hunto, ta mas fuerte so nos ta bira”.