Cada aña nobo ta bin cu su retonan pero tambe cu su bendicionnan. Na Aruba nos tin retonan cu Gabinete Evelyn Wever Croes a bin ta soluciona desde november di 2017 anto nos ta sigui e caminda social democrata den aña 2019. Gobierno a declara e aña aki como Aña di Famia y di Cuido di nos muchanan. Esaki ta na su lugar mirando con e ultimo añanan nos famianan na Aruba ta pasando den tantisimo problema social pa varios motibo. Nos ta consciente cu gobierno no por dicidi con cada conciudadano ta biba nan bida pero si nos kier crea e infrastructura pa promove e nucleo di famia cu ta e base di cualkier sociedad. Nos lo promove mas solidarismo cu un bida progresivo den nos centro di barionan rond di Aruba. Mas movecion, mas deporte y arte, mas tempo social pa cu nos yiunan. Nos mester cambia cierto habitonan den 2019 manera mas cuminda saludabel, mas acceso na fruta y berdura. Tur esaki por pero ta conscientisacion mester pa dirigi nos nacion den un caminda mas progresivo. Nos kier duna nos yiunan e fundeshi firme manera nos antepasadonan cu norma, balor, respet y cariño genuino pa otro sin discriminacion algun.
Na aña 2018 gobierno lidera pa nos Minister President mr. Evelyn Wever-Croes a focus hopi riba financia publico cu tawata deteriora completamente y a trece transparencia bek den gobernacion Arubano, innovacion y integridad. Nos a traha hopi riba husticia y integracion, turismo y nos servicionan a keda firme, hasta tawata tin crecemento den e pilar economico aki. Nos a tuma pasonan firme pa soluciona un problema nacional, esta nos dump na Parkietenbos, nos a hinca hopi esfuerso alabes den innovacion y educacion riba diferente tereno pa nos hubentud y mas cu claro nos a alivia un tiki e peso financiero pa nos grandinan riba pensioen. Nos a pasa un ley historico esta BIG pa nos trece Arubanonan gradua den region y como Dokter nan por cuminsa practica na Aruba, tur esaki den e retonan grandi di renobacion di nos hospital Dr. Horacio Oduber y tambe nos ta bezig cu expansion di IMSAN Dr. Rudi Engelbrecht cu a haya ambulancenan nobo y nos ta bezig ta soluciona hopi reto den e sector aki. Nos tur sa cu un programa di conscientisacion a wordo lansa pa nos hubentud practica deporte y tambe IBISA San Nicolas ta hayando atencion sin e apoyo di Lotto pa Deporte cu ta secuestra ainda pa e gobierno anterior. Tambe a firma un MOU cu nos hermana isla Corsou pa cu e proyecto di Fast Ferry pa San Nicolas. E sector primario a haya hopi atencion y lo cristalisa mas proyecto den e sector aki na 2019. A duna nos hendenan oportunidad pa yega na nan propio cas, un instrumento pa combati probresa. E reto di mas grandi den mi opinion ta nos economia cu tin presupuesta un crecemento di 1% sin nos refineria cu ta keto bay para. Retonan den labor y hopi trabao a wordo haci den e sector social cu lo sigui su caminda cu e plan social e proximo dos añanan. Den linianan grandi e gobierno actual a traha dia y anochi pa percura cu nos por tin un pais sostenibel den tur aspecto.
E costo di bida na Aruba a bira impagabel pero esaki no ta un reto di awe, pero di añas cu a bin ta acumula door di cierto decisionnan politico contra interes general y awe nos ta bibando den e incertidumbre aki. Gabinete Wever Croes no a para keto, a bin ta busca solucion local y internacional pa cu nos sistema di belasting cu ta uno complica y outdated. Nos ta bezig cu e prome fase di cuater di un reforma fiscal husto pa nos por sigui e caminda di prosperidad pa tur biba riba e isla aki. E districto di San Nicolas ta keda un prioridad pa nos saca e parti aki di Aruba fo’i unda e ta. Ta hopi a wordo haci caba den aña 2018 atraves di varios ministerio cu coordinacion di oficina di gobierno Edison Briesen. A cuminsa duna San Nicolas un luz mas positivo, cu tanto cas y edificio bashi y abandona ta dificil pa atrae inversionnan nobo. Nos ta sigui traha cu fe y optimismo cu aña 2019 lo ta un aña di progreso mutuo, dicha y prosperidad rasonabel den tur hogar aki na Aruba. Mi ta desea di curason cu nos digno pueblo sigui biba hunto den harmonia, amor y solidarismo pa un cu otro. Ay nobe’ 2019.