Matadera/Tanki Leendert – Diasabra den oranan di merdia a sosode un caso di hit and run na Matadera. Manera sa, hit and run a bira algo masha “normal” ariba nos isla. Y esaki ta sosode diariamente.
Diasabra un caso di hit and run a sosode na Matadera, y e chauffeur cu a causa e accidente a huy.
Pero e no a yega leu.
E caminda patras cu ta conecta Matadera pa Tanki Leendert a wordo usa pa e chauffeur cu a huy, na stuur di un V-wagen Chevrolet Optra.
Momento cu ela bay subi e crusada pabou di e Kapel di Tanki Leendert eta causa e accidente, cu tawata basta serio y cu hopi daño material.
Despues di a causa e accidente aki y mirando cu e auto v-car no por sigui core, ela baha for di auto y core bay zuid. Lagando e sitio di accidente cu ela ocaciona.
Den e accidente aki dos persona a resulta herida, di cual uno nos a compronde tawata poco serio. E victima aki lo tawata sangrando profusamente pa nanishi.
Algun rato despues e otro chauffeur cu a bira victima na Matadera tambe a yega unda e accidente a sosode y a splica polis tur cos, pues loke e chauffeur irresponsabel a haci.
Paramediconan a atende cu e heridonan. Takelwagen a wordo pidi pa move e autonan for di caminda, pa trafico por a sigui normalmente.
