Noord – Diasabra merdia polis a bay e parkeer plaats di Caribbean Palm Village pa un caso di ladronicia. E ladronicia tawata dirigi ariba un v-car marca MG.
Na yegada nan a topa un pareha turista di edad halto cu a bira victima di criminalidad na Aruba. Auto cu nan a parkeer ayera nochi 10’or y mainta ora a lanta pa bay sali un parti tawata desmantela, esta e parti dilanti banda di chauffeur.
Ladron of ladronnan posiblemente durante oranan di marduga a comete e acto lamentabel aki. Y pa colmo den e parking lot di e hotel y cu tin camera di seguridad.
E ladronnan aki sea nan tawata mester e luz banda robes so, of a wordo stroba di bay cu esun drechi tambe.
Nan a habri e hood y kita waya di e bateria, tambe nan lo a trata di e bay cu grill pero no a logra.
Mirando cu a keda basta vinger prints atras a pidi presencia di Departamento tecnico(BFTO), pa mira si por ta trata di vinger print conoci pa nan. Spera cameranan di seguridad por a capta algo.
Parti mas tristo
E compania a wordo notifica, pero lo a laga sa mirando e temporada cu ta fin di aña, nan no tin mas auto pa duna e turistanan.
Esey no ta tur. Segun nos a compronde tambe cu e seguro cu e turista a bin Aruba cune no cubri “Theft” ladronicia. Dus, e mes lo tin cu cubri e gasto di auto tambe.
Algo sumamente lamentabel pa e pareha, cu a pensa di pasa un cambio di aña trankil ariba e One Happy Island.