Eagle: Diabierna den careda di 4’or y mey di atardi, ta sosode un accident hopi serio na e cruzada di Alhambra, un ciclista hoben ta wordo alcansa pa un auto y ta keda seriamente herida.
E chauffeur di un Toyota Supra cora tabata bayendo direccion nort, na e crusada di Alhambra un ciclista lo tabata biniendo di direccion contrario den verboden of di golpi e ciclista lo tabata riba e berm a dicidi di subi caminda y no lo a pone atencion cu di pazuid tabata biniendo un auto. E chauffeur no por a haci nada mas pa evita e accident.
E impacto tabata hopi fuerte y a laga e ciclista seriamente herida, segun testigo e ciciclista a bay halto y a cay riba e tera banda robes di caminda. Un dokter cu tabata eybanda mesora a sali yuda e victima, mientras e tabata pidiendo pa ambulance cu hopi urgencia.
Un patruya di polis a yega hopi liher na e sitio y a cera e caminda, despues di 10 pa 15 minuut ambulance a presenta y mirando e situacion di e victima, cu urgencia ambulance a transport’e pa hospital.
Aparentemente e ciclista lo a haya hopi sla den pecho y na bariga. E tabata sangra profusamente na su bariga y pa boca. E caminda panort di e crusada a wordo cera pa asina polis di trafico por haci mas investigacion. Aparentemente, e chauffeur di e auto lo no tin su papelnan na ordo.