Sero Colorado – Diaranson ariba di 2 dia di Pasco autoridad un biaha mas ta hayanan “sorpresa” pa un boto laga atras pariba di Baby Beach.
Un boto procedente di Puerto Cabello yama La Falua ta esun cu a drenta, posiblemente horta.
Autoridad no sa di ki ora e boto aki lo a yega.
Mesora autoridad a bati alarma y esnan cu ta tene nan mes bezig cu vigilancia di nos costanan a drenta den accion.
E boto no tawata tin ningun motor mas ariba dje.
Loke si sa, hendenan a drenta.
Pero lamentablemente un biaha mas no ta bin topa ningun hende.
Autoridad ta pensa tambe cu arma y tambe droga lo a drenta.
No ta prome biaha cu nos a trece e mesun sorto di noticianan aki dilanti, solamente e fechanan ta keda cambia.
Loke pueblo ta keda puntra, con por ta posibel cu e botonan aki ta keda drenta na e mesun sitio y sin wordo detecta.
E hendenan aki ta yega y tin tur e tempo di mundo pa piki tur nan pertenencianan y sali bay.
E biaha aki te hasta e motornan a wordo kita, ta asumI cu kizas lama bruto lo por a kita e motornan. Tankinan di gasolin si a keda.
Autoridad a start un investigacion den oranan di mainta, y un rato mas laat autoridad a solicita pa takelwagen di e compania di seguro Nagico pa bay cu e boto.
Lo hiba e boto Balashi, unda lo pone banda di un otro boto y despues lo destrui nan.
Autoridad Venezolano a wordo poni na altura y tambe e matricula a wordo duna na nan.
Aunke cu vigilancia lo ta constante, di parti e instancianan aki esta Kustwacht, Polis Uniforma y otranan, lamentablemente nan mester biba cu e sorpresanan amargo aki cada biaha.