122
Emmastraat, Oranjestad: Dialuna algo despues di 8’or di anochi, un of mas bisiña atento no por a haci nada otro cu bati alarma, nan a yama polis y a bisa polis cu den un cas den Emmastraat un homber lo ta maltratando un damita y cu cada biaha cu e dal’e e dama ta keda grita di dolor. Mesora un patruya di playa a sali bay direccion Emmastraat.
Na yegada polis no por a drenta paso tin un cacho hopi brabo den e cura di e cas. Asina mes nan a logra drenta den e cura y a bati riba e porta di cas. na prome instante niun hende a habri e porta, instruccion a bin cu si nan no habri e porta lo mester bay over na kibra e porta, pero net prome cu polis a bay pa kibra e porta un conocido di polis M.M. a habri e porta di cas. Asina e damita a haya un chens di core sali for di e cas. E damita tabata bou lagrima, na yoramento e la splica polis kiko tabata pasando cune den e cas.
E homber tabata dal’e y cada biaha cu e homber dal’e e tabata grita di dolor. Polis a dicidi di bay cu e damita Warda di Polis, pa asina buska un yudanza profesional pe. Tambe a keda di avisa su famia kiko tabata pasando cu nan yiu muher.
E bisiñanan atento y polis cu mesora a sali bay na e cas, a scapa bida di e damita hoben aki. Tres patruya di polis a bay na e cas pa atende cu e situacion.