Home Police Dos empleado di un compania grandi y conoci di lift, gara ta...

Dos empleado di un compania grandi y conoci di lift, gara ta hortando un cantidad grandi di bebidanan alcoholico for di Riu Palace

Palm Beach: Dialuna den oranan di atardi, na Riu Palace nan a atrapa dos persona ta hortando bebida alcoholico, e dos trahadornan aki ta traha cu e compania mas conoci di lift na Aruba. E compania aki ta duna servicio di lift na varios hotel entre otro Riu Palace. 

Aparentemente pa algun tempo caba Riu Palace tabata nota cu tin un cantidad di bebida alcoholico ta wordo horta for di e hotel, nan a ripara y a cuminsa sospecha riba e trahadornan di e compania aki, pero no ta descarta cu nan por tin sospecha tambe riba cierto trahadornan di e hotel mes cu por ta envolvi den e ladronicia aki.

Den pasado a yega di haya botternan di alcohol sconid den un lift, probablemente lo ta botternan cu nan lo a logra bay cune. Algun dia pasa como 30 botter di alcohol a desaparece.

E hotel a pone mas mihor control y dialuna atardi a canta bingo, na momento cu a cuminsa vigila e trahadornan aki y durante control nan a hayanan ta hortando un cantidad grandi di alcohol.  Un total di mas o menos 20 liter di alcohol, cerbes y otro bebida mas. Nan a gara nan cu rum cu a wordo basha den botter di awa pa disimula, tambe nan a sconde varios bebidad den hemchinan.

Mesora a avisa polis, na yegada polis a detene ambos trahador di e compania di lift aki  y nan a wordo transporta pa Warda di Polis na Shaba. Polis na  e sitio a surgeri e gerencia di RIU pa bay entrega un keho oficial, pa asina por cuminsa cu un investigacion. Autoridad aparentemente a avisa e gerencia di e compania di Lift, e gerencia a bay warda di polis pa haya sa mas di kiko su dos trahadornan tabata haciendo.

Investigacion lo mester saca afo si tin mas persona envolvi y si ta e mesun trahadornan aki tabata horta alcohol na RIU Antillas tambe. No ta descarta cu por ta trata di benta di alcohol procedente di ladronicia.