Home Politics Parlamentario Edgard Vrolijk (MEP): “E practica cu ta parlamentarionan di gobierno mester...

Parlamentario Edgard Vrolijk (MEP): “E practica cu ta parlamentarionan di gobierno mester forma quorum mester ta pa pasado”

E reunion publico di diabierna ultimo no por a continua debi na falta di quorum. Esaki a pasa ya cu no por a forma 11 miembro di parlamento. Na Aruba nos tin e mal custumber cu e otro islanan y nos madre patria Hulanda no conoce, esta e falta di madurez pa no forma quorum. E paisnan aki menciona ta asina madura cu nan sa cu ora bo huramenta como miembro di parlamento bo ta representa bo pais y no bo partido. Y sigur mi persona semper a condena actonanan asina di pasado y ta netamente esaki nos den parlamento no kier a wak mas, pero pa falta di madurez esaki a pasa.

 

Practica robes

E practica cu ta parlamentarionan di gobierno mester forma quorum mester ta pa pasado. Nos tur 21 ta huramenta como miembro di parlamento y unda nos a huramenta pa sirbi nos pais. Na e momento aki cada un di nos ciudadanonan ta paga nos salario pa nos bin trabao y representa nan dignamente. Nan ta spera etica di trabao, seriedad y madurez di parti di parlamento y principalmente un presupuesto cu ta toca un pais completo.

 

Nos reglamento di ordo

Reglamento di ordo ta papia di miembronan di parlamento. Den esaki ta referi na tur 21. Pues cu otro palabra nos tur hunto tin di forma quorum. Pero mentalidad robes ta causa daño na funcionamento di parlamento. Ehempel: imagina pueblo si oposicion bin cu un iniciativa di ley y nan ta 9 y si nos tin mesun mentalidad cu AVP nunca por tin reunion of nos ta forma quorum y mey mey di reunion nos ta sali bay y cu e resultado cu e reunion ta ser posponi. Nos di fraccion di MEP lo no actua asina pero lo t’ey pa atende e reunion y si nos no ta di acuerdo nos ta vota contra y si e ta bon nos lo sostene. Esaki ta e cambio di mentalidad cu pueblo kier y nos a bin pa haci esaki.

 

Otro interpretacion

Den mi interpretacion cu ora un miembro bin dilanti na e catheter y pidi pa conta e cantidad di miembronan, e tambe mester ser conta pasobra e ta presente den parlamento y a pidi pa haci conteo. Pues den principio nos tabata 11 cu e parlamentario cu a pidi conteo.

 

Cambionan

Ta importante pa trece cambio den reglamento di ordo pero sigur mester trece definicion di miembro di parlamento p’asina tur hende por hinca den nan cabes cu 11 ta ser forma door di 21 y no door di esnan di gobierno pasobra tur ta cobra mesun salario. Mi ta kere cu hasta por pensa pa sanciona esnan cu no a percura pa tin quorum, cu excepcion di esnan cu a notifica cu nan no por ta presente.

Tambe ta importante pa realisa cu como parlamentario bo ta representa Aruba den su totalidad. Mescos cu ora ta forma quorum den exterior anto e ora si pueblo tin di pagabo bo gastonan, e ora si bo ta miembro di parlamento, e mester conta tambe pa ora tin reunion den parlamento cu bo ta parlamentario di pueblo y no di un partido unda interes di hunga politica ta bai dilanti.

Y sigur ami no kier keda wak den spiel atras ken a haci kico. Laga nos move dilanti respetando pueblo cu ta paga nos salario.