Home Politics Rocco Tjon: Minister Glenbert Croes ta uni e sector social y Parlamento...

Rocco Tjon: Minister Glenbert Croes ta uni e sector social y Parlamento di Aruba.

 

 

Unanimamente Parlamento di Aruba a aproba e “begrotingsfonds” pa implementa e Crisisplan Social. Na April 2018 ora a trata presupuesto di pais Aruba a presenta un Crisisplan Social pa asina atende cu e retonan social cu nos pais conoce. Ta importante pa señala cu e plan aki a wordo traha door di tur “stakeholders” di e sector social, pa asina na un manera eficiente y eficaz surpasa e retonan.

 

CRISISPLAN SOCIAL

Ora ta papia di un crisis no mester tuma na cuenta solamente e cantidad di casonan pero tambe si e departamento tin e infrastructura necesario pa por atende cu e diferente retonan. E “begrotingsfonds” cu a wordo aproba ayera lo bay percura pa na un manera eficiente por implementa e diferente aspectonan di e Crisisplan Social. Den su totalidad 35 miyon florin a wordo aloca pa asina atende cu aspectonan preventivo, curativo y cuido pa personanan cu limitacion.

 

KORREKTIE INSTITUUT ARUBA

Na diferente momento nos a vocifera cu e ta importante pa yega na un institucion coreccional duradero. Un aspecto cardinal pa logra esaki ta pa e cuido di detenido ta optimal. Esaki ta importante pa e detenido por re-integra optimal bek den comunidad y evita cu e ta bolbe comete un fout ora e regresa den comunidad. Un parti di e fondonan aproba lo percura pa profesionalnan por wordo recluta pa optimalisa e “gedetineerdenzorg”, cual ta un obligacion pa ley, y optimalisa e trayecto di re-integracion y baha recidivismo.

Tambe lo inverti den un sistema di registracion, un “Prisoner Administration System” cu lo wordo conecta cu e “Systema Central di Registracion” di e cadena Hudicial / Social. Algo sumamente importante pa e Instituto Coreccional, su empleadonan y nos comunidad.

 

VOTACION

Minister Glenbert Croes a uni tur profesional y “stakeholders” pa yega na un Crisisplan Social integral pa por atende cu e retonan social. Na mes momento el a uni Parlamento pa sostene su maneho y tur fraccion den Parlamento a reconoce cu e sector social mester di atencion urgente y p’esey unanimamente a sostene e plan di maneho di Minister Glenbert Croes.