STA. CRUZ – Lider di partido AVP un biaha mas ta pasa pa un mentiroso. Laga nos analisa e mentiranan di e siman aki. Awor ta e mentira flagrante cu tur cos ta bay bira caro. Segun Mike Eman tur producto ta bay bira mas caro. Siendo cu esaki no ta berdad.
Bo sa kico ta bay bira un poco mas caro? Alcohol y sigaria. Esey so. Y ta mas husto pa esnan cu ta consumi alcohol of huma sigaria, pa nan paga poco mas na caha di gobierno. Esey ta husto. Y no manera Mike Eman a haci di pone tur hende paga.
Cada biaha cu e pober lider di AVP bolbe purba lanta cabes, e ta gaña. Mike Eman no ta siña su les? Poco tempo pasa, el a sali na grandi cu graficonan den su man cu el’a falsifica di Banco Central. Ora hasta Banco Central a sali y denuncia e mentira, Mike Eman a bay sconde bek den su penthouse, tur cu berguensa cu su farsa a wordo descubri.
Awor el’a bolbe sali di su penthouse ta grita cu reforma fiscal ta un pakete di medida. Otro mentira di Mike Eman.
Pero si 30 mil hende no ta bay paga e belasting mas, 25 mil hende ta bay paga menos belasting. Con esaki por ta medida? Mike Eman a goberna Aruba pa 8 aña, y ningun momento so el a baha e tarifa di belasting pa nos hendenan, clase trahador ni clase media.
Una bes mentiroso, semper mentiroso. Una bes falsificador, semper falsificador.
Mike Eman ta e unico politico cu ta retira y ta bolbe cada biaha bek, anto djis pa bruha tera. Mike Eman mester realisa cu pueblo no kier e, pueblo no ta kere den dje, sinta trankil den su penthouse y wak nos pais wordo goberna pa un gobierno drechi cu ta pone e ser humano central.