Nos ta drentando den dianan sumamente ocupa cu e leynan cu mester wordo trata den Parlamento. Entrante diabierna lo cuminsa e tratamento di diferente Presupuestonan. Pa duna realse y respet na e colegionan halto di Estado, lo cuminsa cu e Presupuesto di Raad van Advies, Presupuesto di Algemene Rekenkamer, y Presupuesto di Parlamento. Despues lo trata e Presupuesto Supletorio 2018 dialuna awo. Tambe lo trata e Fondo di Presupuesto di Crisis Sociaal Plan. Y despues tambe lo cuminsa cu e tratamento di e Presupuesto 2019 diamars en adelante.
Prome Minister Evelyn Wever-Croes a enfatisa cu Presupuesto di pais Aruba lo tuma su tempo pa wordo trata pasobra cada Minister lo mester defende su presupuesto contestando tambe e preguntanan di Parlamento na e Minister. Tambe ta bay tin e leynan cu mester wordo pasa ainda entre nan e cambio ley di LAFT, leynan di Reforma Fiscal, ley pa pone number di auto bek riba plachi y elimina stickernan.
Tur esaki lo wordo haci prome cu fin di aña pa asina finalisa e ciclo presupuestorio di 2018 cu ya for di september aña pasa mester a wordo entrega pero esaki no a tuma luga. Despues cu Gabinete Wever-Croes a drenta Gobierno, a cuminsa traha riba dje y esaki a wordo trata y pasa na april. Unabes cu el a pasa, Gobierno a compremete su mes pa bin bek Parlamento na mita di aña pa duna cuenta. Esaki a sosode na september na unda a hiba un debate amplio y a pone Parlamento na haltura di e cifranan. Pa e di dos mita di aña, Parlamento a ricibi un ‘Najaars Nota’ y e cifranan y awo nan tin e Presupuesto Supletorio cu lo wordo trata dialuna awo.
Prome Minister a indica cu e Presupuesto Supletorio no ta aumenta e deficit sino ta keda un budget neutral y lo no bin nada adicional sino lo tin cambio di algun post den dje.
Cu Presupuesto 2019, e mandatario principal a laga sa cu e ta hopi satisfecho cu Gobierno a yega e norma di 25 miyon florin di deficit pa 2019 cu Gobierno a fiha. Na 2018 e deficit tawata 149 miyon florin. Esaki sigur tawata un paso grandi pa for di 149 miyon florin logra un deficit di 25 miyon. Pero aki comunidad henter a uni y Gobierno ta poniendo Aruba bek riba e caminda corecto, e rumbo husto pa asina pone ordo den e desordo financiero di e gobierno anterior.
“Cumpliendo cu e norma aki y cu locual nos a palabra cu Hulanda recientemente, ta pone cu Aruba ta bay sali for di e deficit y drenta den e parti di surplus”, Prome Minister a enfatisa.