Dia 3 di december Sinterklaas a haci acto di presencia tempran na Marriot hotel. Gobierno, den su empeño pa “reduci” gasto a prefera di presenta e “Reforma Fiscal” na un hotel luhoso en bes di a haci esaki den e sala di reunion di gobierno.
Net prome cu e presentacion aki nos a wordo sorprendi atrobe cu e noticia di e nombracion di un director nobo pa DIP, acompaña cu nombracion di varios empleadonan publico nobo den e aparato gubernamental cu ya tin un sobrepeso. Igualmente minister Otmar Oduber a sigui cu su campaña miyonario di nombracion na e compania Serlimar cu parce tin un fondo financiero basta exclusivo, ya cu ta haci promocion por mayor y detal, usando compania di hendenan hopi cerca di dje, atrobe sin ningun tipo di destaho publico.
Sorpresa parce di a bira e palabra di moda pa e gobierno POREDmep. Esaki hunto “of course” cu e palabra magico “LEASE” en bes di PPP.
Nos a wordo confronta cu sorpresa dia 8 di november ora CAft a manera adverti gobierno cu lo bin medida si no sigui e recomendacionnan haci door di CAft. Sorpresivamente 2 siman despues, dia 22 di november ta cera un convenio (protocol) cu Hulanda na unda Aruba a perde mas autonomia y e control di parti di CAft a bira mucho mas obvio y strangulante.
Con gobierno ta reacciona? Dia 23 di november nos por a tuma nota den “NoticiaCla” cu minister-president ta laga sa di lo laga investiga CAft, pasobra e ta disfunciona. E ora ey ta incomprendibel cu si bo sa cu CAft no ta sirbi, dicon a core firma e protocol dia 22 anto, cu te hasta a duna Caft mas poder di moda cu el a bai sinta no solamente den stoel di gobierno pero mas tristo den esun di Parlamento tambe?
CAft a “spanta” asina hopi cu dia 28 di november ta “conseha” gobierno pa reduci pa 2018 ainda 1.7 miyon florin y Minister-President y Minister di Finanzas a declara di lo no por cumpli cu e “recomendacionnan” haci.
Atrobe ta surgi e pregunta cu si dia 22 di november tabata sa cu lo no por cumpli cu e conseho cu CAft a duna anteriormente, dicon a firma toch dia 22 di november? Esaki ta pa hunga populista cu pueblo? Hunga tiger di papel y mientras ta keda yena e aparato cu hende y sigui complace cu friends & family pa asina ey keda den guera cu CAft dor di no cumpli cu palabracionnan haci?
E protocol en bes di trece paz y trankilidad, parce di a trece mas condicionnan estricto cu gobierno lo mester cumpli cu n’e. E paz parce di tabata mas bien dirigi pa Hulanda y no pa Aruba, pasobra awor a bira mas cla cu CAft ta manda y Aruba mester obedece al pie de la letra. Y esaki ta wordo demonstra cu e hecho cu den e prome fase di e Reforma Fiiscal a inclui e grondbelasting. Na augustus 2018 CAft a trese padilanti su preocupacion cu e aumento di gasto di personal, pero tambe a mustra riba e hecho cu grondbelasting no ta wordo cobra drechi y
manera “de braafste jongetje in de klas”, ata gobierno ta bin cu reforma di grondbelasting.
E rebaho di 60% riba e dividend-belasting ta laga mi corda riba e privilegio cu ex-minister Tico Croes a yega di duna algun di su amigonan. E asina yamá “DIVIDEND-SPECIAL”!!! Straño ta cu CAft den su conseho di augustus ultimo no a conseha nada al respecto. Atrobe esnan cu a sinta cobra miyones na interes paso no a paga e belasting aki, awe un biaha mas ta haya un rebaho di 60%. For di unda gobierno ta bay saca e deficit aki? Pasobra tur tempo e sumanan aki ta wordo poni ora di traha begroting como “uitstaande ontvangsten” di belasting.
Gobierno rebahando e dividend-belasting te na 10% parce di ta cumpli cu nan partnernan liberal den e coalision, mescos cu VVD a bin ta haci na Hulanda den gobierno. Atrobe parce di a sucumbi.
Ta mas cu obvio cu e gobierno di Aruba pa consumo local ta haci comosifuera ta sapatea un poco y ta hasta cuestiona e modus operandi di CAft, pero den combersacion cu Hulanda nos gobierno ta mas bien usa un tono mucho mas submisivo y Hulanda ta sigui cu su maneho neo-colonial.
E ta un duele di waak con e partido di Betico Croes d.f.m. a para bira un “papieren tijger” y con e ta den gara di e Scorpion cu ta sigui gasta placa na su antoho y e pueblo lo mester bai sufri atrobe.
Den varios declaracion gobierno a priminti cu e Reforma Fiscal lo a bin pa ALIVIA TUR pa motibo di e “crISIS-heffing” y cu TUR hende lo bai conoce un REBAHO. Lastimente nos ta constata cu esaki no ta e caso. Gran cantidad di conciudadanonan lo bai sinti e efecto di e Reforma Fiscal aki cu na prome instante a mustra cu ta algo hopi positivo pa TUR hende pero poco poco ta bin resulta cu esaki lo ta pa un “happy few” so.
Booshi Wever
Lider UPP
Brazil 163
Aruba, 6 december 2018