SAN NICOLAS – Awe mainta a tuma luga un acto solem, unda cu gobierno di Aruba a recorda e prome aniversario di e morto cruel y devastador di e dos criaturanan: Rishandroh y Roshandrick. Un morto cu a sacudi nos isla profundamente y sigur a pone nos tur para keto y realisa den ki situacion nos muchanan ta bibando. Parlamentario Sue-Ann Ras (MEP) na e ocasion aki tabatin e honor di planta e mata: Foyo di Crus, hunto cu director di DAS, sra. Glenda Hernandez, cu ta simbolisa e parti di tur e victimanan di abuso y violencia. E prome matanan tabata cada uno na honor di un di e dos criaturanan. E plenchi hunto cu e 3 matanan aki lo fungi como un recordatorio y reflexion pa henter comunidad, pa protega nos muchanan y tur esunnan vulnerabel den nos comunidad, cu a experiencia violencia y abuso. “Realidad ta, cu nos comunidad kier wak mas cambio y ayudo y ta sinti cu nos muchanan no a haya e proteccion necesario y ta di compronde, paso awo nos hendenan a cuminsa bira mas consciente, ta vocifera y ta preocupa cu loke ta pasando y ta kibrando silencio porfin. Mi por garantisa si, cu e trabounan ta andando y tin su retonan, pero na mesun momento ta buscando solucion pa e procesonan ta miho legalmente, duradero y responsabel cu cada caso cu tin y cu ta presentando,” segun Ras.