Madiki Kavel – Diamars mainta trempan polis y tambe ambulance a bay Madiki Kavel, caminda cu na un adres un habitante no tawata duna señal di bida.
Na yegada di polis y paramediconan, mucho nan no por a haci mas.
Algun rato despues por a mira recherche y tambe departamento di BFTO yega e adres, pa asina start un investigacio mirando cu no por saca afo causa exacto di su morto.
Di parti Cuerpo Policial nos a haya e siguiente informacion oficial:
“Awe diamars mainta pa 7:27 central di polis ta haya un jamada cu na madiki kavel un hende homber no ta duna señal di bida. Patruya di playa a bay na e adres menciona . Ambulance tambe a jega na e sitio. Personal di ambulance no por a haci nada pa e persona y pa 8:20 dr Texier ta constata morto di e homber Alex Tromp naci na Aruba 26-09-1964. Fiscal a laga tuma e curpa den beslag mirando cu no por a conclui e causa di e morto.
Recherche a presenta ,tambe polis technico pa asina haci nan investigacion. Slachtofferhulp a wordo pidi pa asina duna e famia e sosten necesario den e momentonan dificil aki .
Cuerpo Policial Aruba ta manda palabra di condolencia na famia di e fayecido”.