Betico su legado a keda pa brindando nos ehempel, guia y strategia con pa mantene e Aruba cu el a diseña pa nos

ORANJESTAD – Ayera Gobierno di Aruba, Parlamento di Aruba, Fundacion Betico Croes y Partido MEP a conmemora e 32 aña di fayecimento di nos Libertador Gilberto Francois “Betico” Croes, e architecto di nos Status Aparte y nos Pais. Bida no a dune e oportunidad di por a maneha su logro di un Pais den Reino cu un Status Aparte, pero su legado a keda den nos mente y curason brindando nos ehempel, guia y strategia con pa mantene y no laga bay perdi e cas, e Pais cu Betico a diseña pa nos.