Prome Minister Evelyn Wever-Croes hunto cu Minister di Finansas Xiomara Ruiz-Maduro diahuebs ultimo a firma e protocol cu Hulanda. Cu esaki ta drenta trankilidad atrobe y asina poco poco confiansa ta wordo reestablese.
DIFERENCIA CU OTRO PROTOCOLNAN
E diferencia mas importante cu otro protocolnan ta cu esaki ta basa riba e maneho di gobierno di Aruba mes. Pasobra Aruba tabata diligente den traha su propio plan financiero y su propio cuadro financiero, den negosacion gobierno di Aruba por a para firme. E hecho cu gobierno, sin protocol caba, tabata ehecuta su maneho, a crea e confiansa cu ta necesario. Esaki a hasi cu no tabata tin espacio Hulanda impone normanan riba Aruba, manera si tabata e caso den pasado.
“Cu e protocol firma aki awor tin trankilidad atrobe pa goberna. E ta den nos man awor pa cumpli cu palabracionnan. Nos lo cumpli cu e palabracionnan pasobra nan ta sowieso basa riba nos maneho, y esaki nos no ta hasi pa Hulanda, esaki nos ta hasi pasobra ta den bienestar di Aruba. Un Aruba cu finansas saludable ta brinda mihor oportunidadnan pa desaroyo economico y cu e desaroyo aki ta bin progreso y bienestar”