ORANJESTAD, Aruba – Tur luna Dr. Horacio E. Oduber Hospital ta eligi su empleado di luna, e colega cu semper ta bay un extra mile den nan trabou. A scoge Mahalia Castillejo-Manuela di Centro di Memoria como e empleado di luna di september. Director di Cuido di Hospital, Ezzard Cilié, a reuni cu empleadonan pa otorga e reconocimento y celebra cu Mahalia Castillejo-Manuela a bira empleado di luna. Durante e encuentro ameno aki a aplaudi Mahalia Castillejo-Manuela pa tur loke el a haci den su trabou y su coleganan tabata orguyoso di mira con el a sobresali.
Mahalia ta coordina e cuido den e team multidisciplinario y ta vigila e colaboracion entre HOH, SABA, Cas Marie, Wit Gele Kruis, AZV, Sevice- y Landslab, Botica y Departamento di Asunto social. Banda di tur e trabou practico cu Mahalia ta haci diariamente e ta e persona di confiansa, persona cu ta contesta tur pregunta, e cara di Centro di Memoria, troubleshooter y hopi mas. Mahalia ta yuda pashent y coleganan cu man habri na un manera sigur y cu hopi atencion. Ademas, Mahalia ta sigui diferente curso pa asina desaroya su conocemento. E ta pro-activo y ta inicia procesonan nobo y ta structura y implementa esakinan tambe. E ta pensa hunto cu tur colega y specialista y ta organisa su trabou na un manera eficiente y puntual. E tin diferente rol den su area di trabou y su profesionalismo semper ta resalta den cualkier asunto cu e ta soluciona. E ta dedica na su trabou, ta tene su mes na e reglanan di HOH y Centro di Memoria, ta traha na interes di e organisacion y ora ta trata un problema etico e ta tuma accion inmediatamente.
Sabrina Sonensein, Psicologo di Centro di Memoria tabata contento cu Mahalia Castillejo-Manuela a bira empleado di luna. El a duna di conoce cu Mahalia Castillejo-Manuela ta e conexion di mas grandi cu ta wanta tur cos hunto. E ta manera un dokter, psicologo, un trahado social, kiermen e ta tur cos hinca den otro. E Centro di Memoria ta contento di tin’e como colega .
Ora di pensa riba Mahalia Castillejo-Manuela, ta pensa riba colegalidad, experencia y profesionalismo, asina Nienke Gonzalez-Diaz, Specialista di ‘ouderengeneeskunde’ y coordinador di Centro di Memoria, a duna di conoce. Tambe ta mira con alegre e ta y cu semper Mahalia ta cla pa scucha otro. E ta un persona cu ta haci hopi cos pareu, ta desaroya su mes, e ta hopi involucra y ta lihe den conocemento.
Un colega ehemplar cu sigur merece e titulo aki. Masha pabien Mahalia cu e bunita reconocimento aki!