Diamars ultimo, Xander Bogaerts riba invitacion di Prome Minister Evelyn Wever Croes, a haci un bishita na Bestuurskantoor. Na e ocacion aki, Prome Minister a expresa cu p’e ta un honor grandi pa felicita un Arubiano kende a pone nomber di Aruba un biaha mas briya internacionalmente. Xander ta un hoben sincero y amable y cu un curason grandi.
Den nomber di henter Aruba, Prome Minister a gradici Xander pa e logro grandi un biaha mas cu titulo di campion mundial den World Series entregando e un bunita Reconocimento di Excelencia pa su dedicacion, determinacion y profecionalismo den su carera den deporte di baseball internacional. Prome Minister a desea Xander hopi exito den su carera pa futuro.
Tambe, Prome Minister a ricibi señora Sandra Brown, mama orguyoso di Xander Bogaerts. Señora Brown ta un pilar tras di exito di Xander. E influencia di un mama riba e bida di su yiunan, ta enorme. Sigur den e caso aki. Pa e motibo ey Prome Minister a entrega na Sandra un homenahe, pa ta un inspiracion pa tur Mama.